Un krísis ekonómiko ku impaktonan negativo, kiko awor?

Posted by

Un krísis ekonómiko ku impaktonan negativo, kiko awor?

Nos ta den un situashon kaminda pa vários dékada kresementu ekonómiko na Kòrsou no ta e kaso. Loke sí por tuma nota di dje ta empresanan ku ta sera nan porta unu tras di otro i manda trahadó kas. Plaka no ta lora den e komunidat aki i asina ei por nota salida masal di yunan di Kòrsou pa Ulanda atrobe. Kasonan di krímen a kue un buèlta i formanan spantoso, kuminsando fo’i ladronisia di outo te atrakonan armá i òf likidashon kruel di miembronan di e komunidat. Den korto tempu uzo di armanan di kandela a demostrá un frekuensia haltu i ta pone ku práktikamente ningun hende no ta safe na sitionan públiko. Hasta gèngnan kriminal sa laga tende di nan. Prinsipalmente den nos barionan por mira e konsekuensianan di pobresa, deterioro sosial, oumento di ilegalidat, inseguridat kresiente, sushedat di formanan alarmante i otro di e fenómenonan ariba menshoná. No, por laga e situashon sigui sali fo’i man! Hopi ta esnan ku ta grita i ta benta tur falta riba gobièrnu, un situashon ku no ta kompletamente na su lugá, pasobra e suidadanonan tambe tin un responsabilidat den e totalidat, nan mester ke traha, yuda su mes i nan famia, kontribuí ku bario i Kòrsou. Ounke salida masal di yunan di Kòrsou pa Ulanda kada biaha ta suak e grado organisatorio di nos isla ainda mas, tòg ta parse ku loke a skapa Kòrsou di problemanan sosial ainda mas grandi i kompliká ta e mesun eksodo menshoná ku a sigui tuma lugá den transkurso di añanan. Ku e krísis aktual a presentá e momento oportuno pa para ketu i kumbiní ku ta ban traha porfin sistemátikamente (planifiká) pa un Kòrsou ku ta riba e trayekto di adelanto i progreso. Si ántes, ounke ku famianan grandi, e komunidat di Kòrsou tòg tabata karakterisá pa un grado haltu di kòntròl sosial, sentido di solidaridat i un forma di kombibensia aseptabel, esei awendia apsolutamente no ta e kaso mas, pasobra medidanan ku a tuma sin ku tabata e intenshon a kousa desintegrashon total den barionan, bisiñanan no ta atendé ku otro, negoshi di droga a drenta barionan. E sentido sosial kasi a bai pèrdí, pero sin e faktor tan importante aki, sin un sentido di kompromiso den bario i finalmente pa Kòrsou, e isla aki lo sukumbí bou di un avalancha di problemanan ku lo sigui krese, siendo si ke duna por ehèmpel un faire chance na turismo i lag’é sirbi komo un di e pilánan di nos ekonomia, anto mester traha huntu, kuminsando den barionan ku un sentido di kompromiso sólido i responsabel pa e núkleo bario, ku rèspèt pa otro, krea un mentalidat hospitalario etcetera. Si ke sigui e linia propagá pa Nashonnan Uní pa subi e grado di produkshon di nos propio kuminda, garantisando kalidat i siguridat di alimentashon, mester tin un koperashon mas estrecho entre suidadanonan di isla aki ku lo ta tangibel den nos barionan. Pues ta momento pa pone tur konsentrashon riba esfuersonan pa mehorá e sirkunstansia na base, den nos barionan. Bario mester bira un núkleo ku hopi ta mira su importansia stratégiko den avanse di e komunidat aki. Si nos barionan ta mihó organisá, si e habitantenan ta mas aktivo, ta partisipá i ta envolví atraves di nan respektivo organisashonnan, huntu ku gobièrnunan ku tambe ta duna e granito di arena, pasobra komo gobernante nan sa i ta konvensí ku BARIO ta instrumental den e desaroyo general, nos huntu ta krea un mihó komunidat kurasoleño. Enfin, e krísis aktual ta brinda e komunidat di Kòrsou retonan nobo i interesante, pasobra salida for di e situashon di malestar ku nos ta konfrontando kuné ya pa vários dékada, ta rekerí profundisashon den métodonan efektivo ku por keda apliká na benefisio di nos barionan, proyektonan ku ta yuda duna kontenido i forsa na union den barionan. Natural mester ta konsiente di e energia, motivashon, kreatividat i determinashon ku tur esaki ta pidi pa lanta hinter un mentalidat nobo for di suela ku ta enfoká riba bario i òf ta krea konseptonan nobo pa bario. No mester mira trabounan den bario djis komo fabor i òf un akto di bon kurason. E punto di salida mester ta pa kuminsá siña hende yuda su mes, su famia, su bario i finalmente Kòrsou. Anto komo akshonnan konkreto: – Siña nos hendenan planta i kria bestia. – Yuda hendenan sikiera kose, kushiná, lesa i skibi, siña solisitá pa haña trabou i eventualmente lanta un propio negoshi. Lanta amor i sentido di responsabilidat pa trabou. – Kuida nos medioambiente i naturalesa (para e trènt di laga Kòrsou sigui bira mas shushi). 

– Aportá na e mentalidat korekto pa desaroyá turismo di manera ku por lanta aktividatnan turístiko ‘booming’ fo’i suela. Kòrsou ta bini na remarke pa apelá na fondonan di Union Europeo pa harma e tipo di trayektonan menshoná.

 

Advertisements

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.