Prome Minister Evelyn Wever-Croes: Poniendo e ser humano central: PRONTO ARUBA LO HAYA SU OMBUDSMAN PA BRINDA PROTECCION NA CADA CIUDADANO

Prome Minister Evelyn Wever-Croes:

Poniendo e ser humano central:

PRONTO ARUBA LO HAYA SU OMBUDSMAN PA BRINDA PROTECCION NA CADA CIUDADANO

 

Desde cu Gabinete Wever-Croes a tuma over gobernacion, a pone e ser humano central y ta trahando pa wak cua ta e formanan pa duna miho proteccion na e ser humano. Aruba ta e unico pais den Reino cu no tin un Ombudsman. Un Ombudsman ta un defensor di pueblo. Caminda cu un ciudadano ta sinti cu e no a wordo bon trata door di un departamento di Gobierno, e por acudi na un Ombudsman kende lo studia e caso y duna conseho na Gobierno con pa actua. Si e ciudadano ta sinti cu su derechonan no a wordo cumpli cu nan, of ta wordo trapa den e proceso di pidi permiso, tereno, restitucion di Impuesto, ta algun casonan valido cu un ciudadan por acudi na un Ombudsman.

5 aña pasa, desde cu Prome Minister tawata den oposicion, el a cuminsa traha riba e tema aki cuestionando tambe cu e Gobierno di e tempo ey no tawata trahando riba e ley aki. Den notanan di Integridad cu Prome Minister e tempo ey cada aña a traha pa presenta na IPKO, el a haci varios proposicion cuanan lamentablemente no tawata tin oido pa nan. Y na fin di e periodo como Parlamentario, prome cu a drenta Gobierno, Parlamento hunto a traha un ley, na unda cu Prome Minister tawata un promotor tras di e ley aki pa bin cu e Ombudsman.

Manera cu e mandatario principal di nos pais a drenta Gobierno, el a pone prioridad na esaki y Gobierno a institui e comision ‘Commissie Versterking en Democratisch Bestel’. E comicion aki mester percura pa fortifica e base democratico na Aruba y nan tambe a trece proposicionnan riba e ley aki.

Pronto e ley di Ombudsman ta bay Parlamento. Ya caba tin fondonan den presupuesto pa e gastonan di e Oficina di Ombudsman. Tambe ya caba tin un persona apunta como e ‘kwartiermaker’ kende lo cuminsa organisa e oficina aki manera cu e ley pasa pa pronto Aruba haya su Ombudsman. Despues tambe lo habri solicitudnan di Ombudsman, Kinder-Ombudsman y demas funcionnan cu e oficina ta rekeri. Posicionnan aki lo wordo yena primeramente door di hendenan cu ya ta trahando den Gobierno caba mirando cu tin un ‘personeelstop’ na vigor. Oficina di Ombudsman ta bay ta un instituto totalmente independiente di Gobierno pa garantisa miho servicio pa atende cu derechonan di ciudadanonan.

Prome Minister Evelyn Wever-Croes

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: