15 trahadó sosial a sigui kurso titulá “The personal is the professional”

15 trahadó sosial a sigui kurso titulá “The personal is the professional”

Willemstad – Komo parti di e Siklo di Simia, Ministerio di Desaroyo Sosial, Labor i Bienestar (SOAW), den su afan pa stimulá un kultura di pas i diálogo den nos komunidat, a kuminsá ku un kurso di 2 dia na trahadónan sosial. Alrededor di 20 trahadó sosial a sigui un kurso riba 9 i 10 di aprel, bou di guia di Prof. dr. Yvonne Sliep. 15 partisipante di ministerio di Hustisia, SOAW i SEDA a risibí un sertifikado di partisipashon na final di e kurso.

Propósito di e kurso tabata pa e trahadó sosial rekonosé sierto orígen di violensia den nos komunidat ku tei kousá pa susesonan den pasado di nos pais. Susesonan manera opreshon di katibu, gueranan mundial i 30 di mei 1969. A enfoká tambe riba e trabou sosial en general, kódigo di kondukta, práktika restourativo i instrumentonan di resosialisashon.

Na final a brinda direktornan di sektor i minister un presentashon di lokual kursistanan konhuntamente a siña i a brinda algun proposishon pa mehorá trabou sosial na Kòrsou.

E grupo a proponé pa: 1. Care for the caretaker. Mester dediká mas tempu na bienestar di e trahadó sosial mes. E trahadó sosial mes, hopi biaha, tambe ta rekerí atenshon i kuido. 2. Introdukshon di Comprehensive Case Study. Comprehensive Case Study ta enserá prevenshon, intervenshon i followup. Aktualmente ta dediká hopi tempu na e parti di intervenshon i menos òf ta hasi tiki trabou preventivo i followup. 3. Mester revisá e Kódigo di Etika pa e trahadó sosial na Kòrsou i kaminda mester, trese kambionan pa mehorá esaki. 4. Un protokòl tokante kon, ki ora ta interkambiá informashon di kliente i formashon di timnan multi-disiplinario ku e meta pa organisashonnan sosial traha huntu riba problemanan di e mesun kliente.

Pa e kursista ta importante pa bini mas kurso similar pa e trahadó sosial por mehorá su mes i e servisio ku e ta brinda na kliente.