VEREDIKTO DEN HUISIO SUMARIO ENTRE GOBIERNU DI KORSOU I SINDIKATO SAP RELASHONÁ KU WÈLGA DI “VVC”

VEREDIKTO DEN HUISIO SUMARIO ENTRE
GOBIERNU DI KORSOU I SINDIKATO SAP RELASHONÁ
KU WÈLGA DI “VVC”
Ayera dia 10 di aprel 2019 e Huisio sumario ku Gobièrnu a entamá kontra e sindikato SAP (SAP) relashoná ku e wèlga di e personal ku ta traha na e departamento di Veel Voorkomende Criminaliteit (VVC) a keda tratá
den Korte.
E wèlga aki a kuminsá despues ku entrante 1 di aprel último, mando polisial a kuminsá ehekutá e desishon di re aloká algun miembro di personal ku temporalmente tabata na disposishon di otro servisionan interno, na wardanan di polis. Awe, 11 di aprel Hues den Promé Instansia a dikta sentensia den e kaso aki. Konforme petishon di gobièrnu, Korte a determiná ku e wèlga organisá riba inisiativa di sindikato SAP ta ilegal i a ordená e sindikato pa instruí su miembronan pa reanudá trabou denter di un ora despues di entrega
di e sentensia. Den su veredikto, Korte ta konsiderá lo siguiente:
E wèlga a wòrdu organisá riba inisiativa di SAP for di 1 di aprel último.
Korte a konkluí ku e wèlga ta ilegal, pa motibu ku:

1. No ta trata di un konflikto di interes ku ta duna e persona(nan) derecho di wèlga sigun lei (art. 6 insiso 4 di ESH). Segun Korte ta trata aki di un konflikto legal relashoná ku posishon hurídiko di algun ámtenar individual basá riba e desishon di mando polisial di re aloká e personal aki na nan sitio di trabou ofisial. Segun Korte e tipo di konfliktonan aki no ta duna derecho di wèlga.

2. E medida di wèlga ta desproporshonal. Den e kuadro aki, Korte a remarká ku te e momentu ei no tabata kla pa Korte, ki meta SAP tabatin ku e wèlga.
Mas aleu Korte ta remarká ku kontrali na loke e sindikato a trese dilanti, Gobièrnu (mihó dicho Maneho di Kuerpo Polisial ) no a, ni tampoko ta evitá ni nenga di deliberá ku sindikatonan i den e kaso aki ku SAP. Segun Korte, Gobièrnu a demostrá sufisientemente, ku e wèlga en kuestion ta netamente stroba ehekushon di sierto tareanan polisial, ku ta krusial pa garantisá seguridat di komunidat.
Sindikato SAP na su turno a pidi hues pa ordená minister di Hustisia pa sinta ku nan na mesa pa deliberá tokante e situashon di inseguridat eksistente bou di Kuerpo Polisial i ku en kuantu e problemátika aki sugerensianan di SAP mester wòrdu tumá den konsiderashon dor di Mando Polisial. Hues a rechasá e petishon aki, a base di lo siguiente:

1. SAP no a demostrá ku tin ningun base legal pa ordená Gobièrnu pa sinta ku nan na mesa den e kaso
aki.

2. Kontrali na e loke SAP ta deklará, Gobièrnu (Maneho di Kuerpo Polisial) a demostrá ku nan ta
dispuesto na deliberá tantu ku trahadó komo ku sindikatonan.

3. No ta na Korte pa determiná ku Maneho di Kuerpo mester konsiderá e sugerensianan di SAP.

Minister di Hustisia a keda informá ku SAP a sigui órden di hues i a instruí e trahadónan ku tabata den wèlga pa reanudá trabou denter di un ora manera hues a dikta. Ta bon pa ilustrá ku e desishon ku Maneho di Kuerpo Polisial a tuma, ta hustamente despues di un periodo ku polisnan en general a ekspresá nan preokupashon pa loke ta trata nan propio seguridat i ku a kuminsá reuní huntu pa traha riba un base serio pa halsa e seguridat di e miembronan di kuerpo, p’asina na nan turno, nan por brinda un mihó servisio na komunidat en general.
Den algun seshon kaminda Minister di Hustisia a reuní ku un kantidat di trahadó konhuntamente ku Tim di maneho i representantenan di e 3 sindikatonan di kuerpo polisial, algun idea ku trahadónan huntu ku Mando Polisial a formulá a keda presentá pa logra e meta aki. E desishonnan en kuestion pa reforsá e polis riba kaya i na wardanan di Polis (Noodhulp i Handhaving), ku a keda ehekutá pues, tabatin komo meta pa alsa seguridat di e personal i seguridat di komunidat general.

Pa finalisá, Tim di Maneho i Minister di Hustisia lo sigui dialogá ku miembronan di personal aktivamente, pa asina mas tantu posibel eliminá tur inkietut ku por surgi riba tereno di trabou.
Mas aleu, Minister tin tur konfiansa di por sigui konta ku e aporte konstruktivo di tur sindikato polisial, tantu den e konsultanan mensual ku Tim di Maneho (SOV), komo den e konsulta regular ku Minister di Hustisia, di kua e último a tuma lugá djaluna 1 di aprel último.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: