Willemstad- Ministerio di Desaroyo Ekonómiko (MEO) a disidí di kanselá e Ban Topa pa produktornan di artesania lokal i ‘standhouders’ ku tabata plania pa tuma lugá 3 di mei próksimo te próksimo aviso. Tin deseo pa tene e Ban Topa, mas despues durante aña ya asina por trese rebendedónan i produktor lokal huntu i ku suerte, logra stimulá benta di produkto representativo di Kòrsou na stèntnan den Punda i Otrobanda. Pero falta e aserkamentu direkto ku e produktornan lokal. Pa por hasi esaki, mester mehorá e lista di dato di produktor lokal di artesania i kompanianan ku ta ofresé souvenir, regalo, merkansia representativo di Kòrsou.

Produktonan representativo di Kòrsou ta tene kuenta ku nos herensha kultural tangibel

(p.e. lugá, monumento, bestia, mata, palu, flor) i intangibel (p.e. práktikanan, kustumbernan, ekspreshonnan, konosementu). Mayoria stènt den sentro di siudat no ta bendiendo produkto representativo di Kòrsou. I artesania lokal, traha na Kòrsou òf hasiendo uso di materia prima lokal ta den minoria serka standhouders.

MEO a risibí masha tiki reakshon di produktor lokal despues ku a duna di konosé ku lo tene un Ban Topa. Pa e motibu aki ke bai investigá e grupo di produktor lokal mas mihó. Aktualmente tin un trayekto pa inventarisá e produktonan ku ta keda ofresé na e stèntnan di Punda i Otrobanda.

Keda pendiente pa mas detaye tokante e desaroyo di maneho di ‘standplaats’  i mehorashon di e produkto di turístiko di den sentro di siudat.