Den Carifta Junior Chess Championship 2019 Ahedresista David Pietersz gran ousente

Posted by

Den Carifta Junior Chess Championship 2019 Ahedresista David Pietersz gran ousente

 

Kampion hubenil di ahedres di Kòrsou David Pietersz ta e gran ousente durante e di 8 edishon di Carifta Junior Chess Championship 2019. Apesar di esaki tin hopi espektativa pa prestashon dje tim maskulino enkabesá pa  entre otro Timothy Carolina i Frederic Simonis.

Federashon Ahedres Kòrsou (FEDAKO) ta organisá e kompetensia di ahedres hubenil di Karibe. Esaki ta sosodé bou di ouspisio dje Confederation of Chess for the Americas (CCA) i ku na su turno ta kai bou dje federashon mundial di ahedres FIDE.

Falta apenas 2 dia pa e di 8 edishon di Carifta Junior Chess Championship 2019 ranka sali. Un total rèkòrt di 185 ahedresista hubenil for di 11 isla i pais den Karibe ta kompetí den e kampionato aki ku tuma lugá na Kòrsou. E apertura ofisial ta tuma lugá mañan djaweps 18 di aprel na Curaçao Hilton Resort i e kompetensia ta dura te ku 23 di aprel.

Dje 185 ahedresistanan ku ta kompetí den e kampionato, no menos ku 55 ta di Kòrsou. Lamentabelmente pa motibu di un proyekto di skol den eksterior, Kòrsou su mihó ahedresista hubenil maskulino no ta partisipá. Porsierto ku David Pietersz na 2015 den kategoria di edat 14 aña i mas hóben (U14) a gana medaya di oro den Carifta Junior Chess Championships.

Ademas David Pietersz a forma parti tambe dje tim di Kòrsou ku a partisipá aña pasá na Olimpiada di Ahedres na Batumi, Georgia ku ta pegá ku frontera di Russia. Ela laga un tremendo impreshon atras i asta a sali den un publikashon renombrá durante e kompetensia aki, loke tabata un bon propaganda pa Kòrsou.

Apesar ku David Pietersz no ta presente pa defendé kolónan lokal, e tim maskulino ta konta ku partisipashon di algun tremendo talento manera Timothy Carolina i Frederic Simonis. Porsierto ku Simonis tin eksperensia kompetitivo den e kampionato di Karibe, ya ku na 2017 ela kompetí i gana medaya di bròns den U10. Aña pasá tambe ela partisipá den U12 pero no a logra un medaya, apesar ku ela kaba e kompetensia ku 5 punto for di 7 partido.

E di 8 edishon di Carifta Junior Chess Championship ta konta e aña aki tambe ku e kategorianan ofisial U12, U16 i U20, miéntras ku tin e supkategorianan U8 i U10 tambe. Kòrsou ta bon representá den e kategorianan aki tambe pa ahedresistanan femenino.

E di 8 edishon di Carifta Junior Chess Championship 2019 tin MCB komo patrosinadó mayó miéntras e ko-patrosinadónan ta Banco di Caribe (BdC), Curaçao Tourist Board (CTB), Refineria di Kòrsou NV, Curaçao Seaquarium, Johannes Bosco Stichting, gobièrnu di Kòrsou i Curaçao Hilton Resort.

Pa mas informashon dje kampionato di ahedres hubenil di Karibe, públiko por klek riba e wèpsait di FEDAKO: www.curacaochessfederation.com.

Advertisements

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.