Prome Minister Evelyn Wever-Croes: Poniendo e ser humano central: SEÑORA SAHAYRA KELLY TA E ‘KWARTIERMAKER’ ENCARGA PA ORGANISA OFICINA DI OMBUDSMAN

Prome Minister Evelyn Wever-Croes:

 

Poniendo e ser humano central:

SEÑORA SAHAYRA KELLY TA E ‘KWARTIERMAKER’ ENCARGA PA ORGANISA OFICINA DI OMBUDSMAN

 

Aruba pronto lo tin su propio Ombudsman. Ya caba e procedura ta andando pa Ombudsman pronto bira un realidad na nos pais tambe. Prome Minister Evelyn Wever-Croes a reuni cu señora Sahayra Kelly, kende ta e persona apunta como ‘kwartiermaker’ di Ombudsman.

 

Desde cu Gabinete Wever-Croes a tuma over gobernacion, a pone e ser humano central y ta trahando pa wak cua ta e formanan pa duna miho proteccion na e ser humano. Aruba ta e unico pais den Reino cu no tin un Ombudsman. Un Ombudsman ta un defensor di pueblo. Caminda cu un ciudadano ta sinti cu e no a wordo bon trata door di un departamento di Gobierno, e por acudi na un Ombudsman kende lo studia e caso y duna conseho na Gobierno con pa actua. Si e ciudadano ta sinti cu su derechonan no a wordo cumpli cu nan, of ta wordo trapa den e proceso di pidi permiso, tereno, restitucion di Impuesto, ta algun casonan valido cu un ciudadano por acudi na un Ombudsman. Prome Minister ta un promotor tras di e ley aki pa bin cu e Ombudsman. Pronto e ley di Ombudsman ta bay Parlamento. Ya caba tin fondonan den presupuesto pa e gastonan di e Oficina di Ombudsman.

 

Señora Sahayra Kelly Tambe como ‘kwartiermaker’ ya caba a cuminsa planifica e oficina aki. Despues cu e ley pasa, lo habri solicitudnan di Ombudsman, Kinder-Ombudsman y demas funcionnan cu e oficina ta rekeri. Posicionnan aki lo wordo yena primeramente door di hendenan cu ya ta trahando den Gobierno caba mirando cu tin un ‘personeelstop’ na vigor. Oficina di Ombudsman ta bay ta un instituto totalmente independiente di Gobierno pa garantisa miho servicio pa atende cu derechonan di ciudadanonan.

 

Prome Minister Evelyn Wever-Croes: “E plannan pa introduci e Ombudsman ta bayendo den bon caminda, pendiente di e ley cu mester wordo trata dentro di poco den Parlamento. Esaki ta un proyecto cu mi a cuminsa 5 aña pasa caba, tempo mi tawata den oposicion. Y awo esaki ta bira un realidad pa asina cada ciudadano di nos pais por sinti e siguridad cu nan derechonan lo wordo respeta. Di e manera aki e ser humano ta wordo poni central”.

Kwatiermaker Sahayra Kelly

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: