Eksitoso enkuentro di e ofisinanan di Asuntunan Públiko di Hulanda, Aruba, St. Maarten i Kòrsou  

Ofisinanan di Asuntunan Públiko di Hulanda, di Aruba, di St. Maarten i di Kòrsou a topa otro atrobe riba e asina yamá plataforma Persoonlijke Informatie Voorziening Antillen en Aruba (PIVA). E enkuentro aki ta tuma lugá 2 biaha pa aña riba un di e islanan ku antes tabata forma Antia Hulandes. E kombersashonan ta trata desaroyonan tokante asuntunan sivil, pasaporte i maneho.

E enkuentro mas resien a tuma lugá riba 15 i 16 di aprel último durante kua e respektivo hefenen di departamentonan di asuntunan Sivil di Aruba, Bonaire, Kòrsou, Saba, Statia, Sint Maarten, gabinete di gobernadónan di Aruba, Kòrsou i Sint Maarten, Servisio Nashonal di datonan di Identidat i di Ministerio di relashonnan interior di Reino a trata e tema: “Sin vishon no tin mishon, sin akshon no tin éksito”.

Kòrsou tabata anfitrion di no ménos di 34 persona kendenan a interkambiá di pensamentu riba problemanan i solushonnan relashoná Plan di kalamidat, tiponan di dokumento pa biaha, venezolanonan imigrante i tambe e fenómeno di matrimonio fiktisio. Tambe a konmemorá e echo ku ta 20 aña pasá a lanta e plataforma. E promé presidente, sr. Pacheco Römer, tambe tabata tei presente i a kompartí brevemente e historia di PIVA.  Sr. Armin Konket, minister enkargá ku Gobernashon, Planifikashon i Servisio Públiko, durante un sena. a dirigí su mes na e plataforma pa ekspresá su satisfakshon pa e gran trabou ku esnan enbolbí ta desplegando. Tambe el a trese dilanti ku Gabinete Rhuggenaath, riba término korto, lo por anunsiá avansenan importante den realisashon di e asina yamá ‘Stelsel van Basisregisters’. Ta trata aki di e proyekto pa logra ku e diferente registronan ku diferente instansianan por komuniká ku otro fasilitando asina e bida di suidadanonan i oumentando efisiensia den interkambio di informashon entre p.e. Kranshi i Servisio di Impuesto. Esaki lo ta un base importante pa e proseso di digitalisashon di Korsou.