Prome Minister Evelyn Wever-Croes: VIOLENCIA Y ABUSO DI MUCHA, HENDE MUHER Y HENDE HOMBER TA CONDENABLE

Prome Minister Evelyn Wever-Croes:

VIOLENCIA Y ABUSO DI MUCHA, HENDE MUHER Y HENDE HOMBER TA CONDENABLE

E siman tras di lomba tabata un siman cortico di trabou. Hopi hende ainda a gosa di e vakantie y campamento di Pasco Grandi. Lamentablemente e celebracionnan aki a mustra e banda scur tambe di cierto sector di comunidad: violencia y abuso. No un, sino varios caso a tuma luga di cual esunnan mas serio ta e caso di un señora cu a wordo asesina pa su ex pareha lagando yiunan chikito atras y e caso di violacion sexual di un hoben di 12 aña.

“Nos sa cu e problemanan social den nos comunidad ta grandi, y cu lo tuma tempo prome cu claridad vence scuridad. Sinembargo nos Gobierno kier manda un señal hopi cla y determina na tur esnan concerni; cu e actonan aki ta condenable y ta contra derechonan humano y no ta existi ningun hustificacion pa esaki.

Den e Crisis Plan Social nos ta poniendo tur atencion riba e problemanan aki, y mi compromiso ta pa agilisa e accionnan pa combati tur clase di violencia y abuso di hende muhe, homber y mucha, pa duna mas guia con pa evita e abusonan aki y con pa baha cu man duro contra e abusadornan. HUNTO nos por caba cu violencia y abuso contra hende muhe, hende homber y mucha”, Prome Minister Evelyn Wever-Croes a duna di conoce.