GOBIERNU DI KORSOU: Update di trabounan i promé resultadonan riba e barku FREEWINDS relashoná ku kaso konfirmá di Sarampi.
GOBIERNU DI KORSOU: Update di trabounan i promé resultadonan riba e barku FREEWINDS relashoná ku kaso konfirmá di Sarampi.
Trabounan durante bishita na e barku
Willemstad – Riba djasabra, 5 di mei, e barku FREEWINDS a drenta haf di Kòrsou. Tur aspekto di su yegada a ser kordiná entre Outoridatnan di Haf, agensia di barku, outoridatnan di imigrashon, douane i departamentu di Epidemiologia pa asina mantené un kòntròl total riba e situashon. Durante henter djasabra departamentu di Epidemiologia huntu ku departamentu Malesanan Kontagioso a realisá entrevistanan serka e tripulante i e grupo di pasahero. E trabounan realisá tabata pa identifiká personanan ku ta kore riesgo, personanan vakuná kontra di Sarampi i posibel kasonan nobo di Sarampi.
Dòkternan di GGD ku a bai abordo a entrevistá i kombersá ku e pashènt diagnostiká ku Sarampi pa evaluá su kondishon i konfirmá ku el a kura kompletamente i ku no tin ningun riesgo pa otronan. Huntu ku e dòkter di e barku tambe nan a tuma nota di e lugá di isolashon i a konfirmá ku durante e periodo di kontagio e persona tabata totalmente isolá. Esaki ta konfirmá tambe ku e chèns ku personanan riba e barku òf bishitantenan di e barku di pega ku Sarampi ta masha masha chikitu.
Total a entrevistá 318 persona, 102 pasahero i 216 tripulante, esta tur hende na bordo inkluyendo e pashènt mes. E promé parti di e trabou, entrevistanan, a konkluí despues di 6’or di atardi.
A tuma e desishon tambe pa realisá análisis di laboratorio na RIVM na Hulanda pa identifiká di manera definitivo ken tin imunidat kontra Sarampi. Profeshonalnan di ADC huntu ku 2 enfermero di departamentu di Malesanan Kontagioso (GMN), a keda te lat anochi pa kue sanger di tur esnan nesesario.
Total a kue sanger di 185 tripulante i 92 pasahero, e trabounan aki a dura di 4’or te 9.30 di anochi. Sobrá personanan, 31 tripulante i 10 pasahero, ku por a demostrá ku nan a risibí e vakuna kontra di Sarampi i naturalmente e kaso mes ku a haña Sarampi, no tabatin mester duna muestra di sanger.
Kontrali na lokual a sali den publisidat niun hende di e barku FREEWINDS no a baha for di e barku ainda. Pa kontrolá esaki mes tur kos a keda kordiná ku Outoridatnan di Haf manera a splika anteriormente.
Entretantu e muestranan di sanger a yega laboratorio RIVM. Ta spera e resultadonan pa mas tardá djaweps awor. Una bes e resultadonan a drenta konhuntamente ku Organisashon Panamerikano di Salú (PAHO), e agensia di Salú Públiko di Caribe (CARPHA) i RIVM lo determiná e siguiente pasonan.
Trabounan anterior na bishita na e barku
For di djabièrnè 3 di mei te ku djaluna 6 di mei a logra entrevistá 108 persona ku a bishitá e barku durante e periodo di 22 te 28 di aprel. Mayoria tabata personanan ku a reakshoná riba petishon di GGD pa tuma kontakto, otronan a ser identifiká for di listanan di organisadónan di eventonan.
E intenshon ta pa monitoreá un grupito di esakinan pa wak si nan ta desaroyá síntomanan di Sarampi, ounke ku e chèns pa esaki a sosodé ta masha chikitu.
Nos ta hasi un petishon pa hendenan ku no a tuma kontakto ku GGD ainda, hasi esaki mas pronto posibel yamando number 9345 òf 0800-0888. Si no logra kontakto por fabor sigui purba pasó tin hopi yamada ta keda drenta.
Ademas di esaki a sòru pa tur pasahero ku a baha di barku promé ku 28 di aprel a wòrdu kontaktá dor di e barku. Nos lo perkurá pa e diferente departamentunan di salú den e paisnan konserní lo sigui monitoreá e grupo aki.
Ta pidi tur mayor pa sòru ku muchanan ta vakuná segun e skema di vakunashon di Departamentu Salú Hubenil. Pa bo konfirmá ku bo yu(nan) a pasa e vakunanan konsultá e karchi di vakunashon. Muchanan mas yòn ku 19 aña ku a pasa tur vakuna no ta kore ningun riesgo.
Si bo no sa bo status di vakunashon i bo no sa si bo a haña Sarampi i bo tin entre 19 i 50 aña lo bo por risibí e vakuná na Ofisina di Vakunashon pa Adulto di GGD na Zakitó. Por bèl e Enfermera pa splikashon òf un sita via number di telefòn 432-2860. Si no haña kontesta por laga fam i number di telefòn den e aparato di kontestá i lo tuma kontakto ku bo.
Síntomanan di Sarampi ta:
Keintura haltu ku ta kuminsá direpente, tosamentu, nanishi ta kore, wowo kòrá ku ta kore awa. Tres pa sinku dia despues di a kuminsá bira malu e persona ta haña iritashon di kueru (rash, uitslag) ku ta kuminsá aparesé na e rant di kabei, despues sigui na kara, despues kurpa i por último man ku pia.
