PTH i OW ta atendé ku kobá peligroso riba Jan Noorduynweg

Willemstad – Resientemente, Projectteam Toezicht en Handhaving (PTH) huntu ku Servisio pa Obra Públiko (OW) a laga tapa un kobá peligroso kantu di kaminda riba Jan Noorduynweg.

Esaki tabata enkonekshon ku un notifikashon ku PTH a risibí tokante un situashon alarmante pa peaton den e área entre Kooyman i Daboussi Motors riba Jan Noorduynweg.

Na yegada PTH, a papia ku e desaroyadó di e proyekto ku deklará ku e tin un pèrmit di konstrukshon pa e proyekto. Úniko punto ta ku e ‘keermuur’ di 500-600 minimeter lo ta igual ku esun di Kooyman den ekstenshon pa yuda wanta tera.

PTH a midi e distansia di e muraya, i a konstatá ku no ta tur kaminda ta bon kobá. E slüf resientemente kobá ta 1400 minimeter, ku no ta kuadra. PTH a duna òrdú na e desaroyadó pa tapa e slüf, i hala esaki mas patras segun e midi eksakto di 2 meter pa peaton por pasa.

Tambe PTH a indiká ku mester buta barikada pa e seguridat di e outomobilista i peaton ora ta trahanso.

E desaroyadó a komprondé e situashon i lo adaptá e konstrukshon, pa asina ehekutá tur loke PTH a ordená

PTH lo sigui pasa kontrolá e situashon.