Gobièrnu di Kòrsou eksplorando mas benefisio pa nos studiantenan den region!

Gobièrnu di Kòrsou eksplorando mas benefisio pa nos studiantenan den region!

Geplaatst op 13 Mei 2019 dor di Ministerio di Enseñansa, Siensia, Kultura & Deporte

Willemstad- resientemente Minister di Enseñansa, Siensia, Kultura i Deporte sra. Marilyn Alcalá-Wallé a realisá un mishon kòrtiku na Miami kaminda ela reuní ku sr. Rob Zaagman, Consul-generaal a.i na e “CONSULAAT GENERAAL DER NEDERLANDEN” ubiká na Miami. Durante di e enkuentro Minister a plantea na sr. Zaagman, siendo representante di Reino na Miami, e nesesidat pa duna nos studiantenan den region mas benefisio durante nan estudio na Florida.

Kada estado den Estados Unidos tin su propio maneho i mirando ku mayoria studiante den region ta na Florida, Minister a kuminsá atendé ku e estado di Florida komo esun promé. Florida konosé e asina yamá “Florida Board of Governors” ku ta un kuerpo di 17-miembro ku ta dirigí e sistema di tur e universidatnan públiko na Florida (the State University System of Florida). E ta forma parti di Florida su sistema di edukashon avansá i ta ubiká na Tallahassee.
“Florida Board of Governors” a keda instalá na 2003 pa operá, regulá, kontrolá i karga e responsabilidat pa e maneho di hinter e sistema konsistiendo aktualmente di 12 universidat públiko na Florida, ku ta:

1. Florida A&M University (Tallahassee)
2. Florida Atlantic University (Boca Raton)
3. Florida Gulf Coast University (Fort Myers)
4. Florida International University (Miami)
5. Florida Polytechnic University (Lakeland)
6. Florida State University (Tallahassee)
7. New College of Florida (Sarasota)
8. University of Central Florida (Orlando)
9. University of Florida (Gainesville)
10. University of North Florida (Jacksonville)
11. University of South Florida (Tampa)
12. University of West Florida (Pensacola)

E “State University System of Florida” (SUSF of SUS) enserando e 12 universidatnan den 2018 tabatin mas ku 341.000 studiante, di kual un parti ta studiante internashonal. Práktikamente tur e universidatnan ta hiba un maneho distinto pa studiantenan internashonal. Asina por ehèmpel studiantenan internashonal ta paga hopi mas kolegiatura (collegegeld) ku studiantenan merikano. Den e eksplorashon di Minister Alcalá-Wallé pa logra “in state tuition” pa nos studiantenan, ta resultá ku segun akto 7.007 di “Latin American and Caribbean Scholarship Eligibility”, e universidatnan na Florida por duna studiantenan di Latino Amerika i di Karibe ku ta studia riba un base “full-time”, e asina yamá kolegiatura lokal.

Pues ta posibel pa nos studiantenan na Florida paga e mesun suma ku e studiantenan merikano (lokal) ta paga na e universidatnan públiko (esnan privá ta otro). E universidatnan públiko sinembargo por pone kriterio adishonal pa e studiantenan internashonal. Esaki ta eksigí pa atendé ku kada universidat separadamente pa logra mihó kondishonnan pa nos studiantenan.

Aktualmente sr. Rob Zaagman, e Consul-generaal a.i. di Reino ta asistiendo Minister Alcalá-Wallé ku e trámitenan pa riba tèrmino korto por logra mas benefisio pa nos studiantenan na Florida.

Riba e foto Minister Alcalá-Wallé huntu ku sr. Rob Zaagman i sra. Willemijn (Mina) Kallenberg, konsul interino di Reino na Miami (Deputy Consul General of the Consulate General of the Kingdom of the Netherlands in Miami).

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: