Mester duna kuenta i rason na tempu pa medio di e kuenta anual 2018 audita dor di un akountent!

Mester duna kuenta i rason na tempu pa medio di e kuenta anual 2018 audita dor di un akountent!

Den e reunion di Parlamento di Kòrsou di dia 9 di mei 2019, parlamentario Curtley Obispo a indiká ku mester duna kuenta i rason na tempu pa medio di e kuenta anual (“jaarrekening”) di aña 2018 audita dor di un akountent!. Pa loke ta trata gobernashon di Pais Kòrsou esaki ta konta sigur pa tur kompanianan anónimo (nv nan) i fundashonnan di Pais Kòrsou a base di nan propio statutonan. Tambe esaki ta konta pa tur instansianan derivá for di lei i órganonan di estado di Kòrsou, a base di e leinan ku nan a wòrdu instituí.

Segun Parlamentario Curtley Obispo, ta super importante pa entidatnan ariba menshoná duna na tempu kuenta i rason over di aña 2018 ku sifranan kontrolá dor di un akountent, pa asina por sa entre otro: (1) resultado finansiero di aña 2018, (2) e balansa finansiero, likides i solvabilidat riba 31 desèmber 2018 i (3) posibel riesgonan pa ku: (a) ehekushon di Presupuesto di Pais Kòrsou 2019 i  (b) e promé konsepto di Presupuesto 2020 di Pais Kòrsou.

Den kaso spesífiko di mayoria entidatnan ariba menshoná e fecha límite pa entrega nan kuenta anual di aña 2018, a base di statutonan òf e lei ku nan a wòrdu instituí ta: promé ku 1 yüni 2019. Pues tin ku duna kuenta i rason na tempu na Gobièrnu di Kòrsou i e Minister responsabel i Departamento di Finansa. Pa asina sifranan i datos ta al dia di tur e entidatnan aki den e Rapòrtnan 2019 di Maneho Finansiero/ Ehekushon di Pais Kòrsou.