Konsulta Nashonal pa krea solushonnan integral i duradero pa Kòrsou

Konsulta Nashonal pa krea solushonnan integral i duradero pa Kòrsou

Geplaatst op 16 Mei 2019 dor di Ministerio di Asuntunan General i Promé Minister

Gobièrnu di Kòrsou, den reunion di Konseho di Minister di 10 di aprel 2019, a aprobá institushon di Konsulta Nashonal. Meta prinsipal ta pa krea sosten amplio den komunidat pa e pakete di proposishonnan ku mester duna kontenido na rekuperashon sosio-ekonómiko duradero. E aserkamentu ta diferente den sentido ku ta aserká e problemanan konosí pero for di un otro perspektiva ku gruponan den nos komunidat.

E preokupashon grandi den nos komunidat ta pa mira desaroyo ekonómiko duradero pasobra esei ta e motor pa krea kuponan di trabou. Banda di esei  nos pais tin otro retonan importante ku mester atendé kuné manera futuro di Refineria Isla. Den e konteksto di e ‘Strategia di kresementu: Huntu i Integral’, gobièrnu a indiká un kuadro pa logra kresementu sosio-ekonómiko duradero ku mester kondusí na bienestar i prosperidat pa henter nos poblashon.

Bou di guia di Sr. Giovanni King un grupo di trabou lo prepará e buèltanan di e konsulta nashonal den kua lo hiba kombersashon ku gremionan den nos komunidat. Ta importante pa nota ku e diseño di e diálogo lo ta unu kompletamente diferente. Den e promé fase ta inventarisá, tene konsulta ku gruponan manera Plataforma Kòrsou ta Avansá, Konseho Sosial Ekonómiko (SER), SVB, sekretariado UNDP i otronan. Ta sali for di e Strategia di Kresementu komo base.

Anteriormente hopi organisashon manera VBC, KvK , sindikalismo, NGO i otronan a presentá dokumentunan amplio ku nan vishon kon pa atendé ku retonan ku e pais aki ta konfrontá. Den e fase aki ta pidi e organisashonnan ei pa indiká e tres puntonan di mas importante di nan dokumentu ku nan ta kere ku ora gobièrnu, partnernan sosial i sektor privá implementá esakinan ku esei lo yuda pa trese e bienestar i prosperidat den e próksimo 3 pa 5 añanan pa nos poblashon.

Den e fase 2 ta kuantifiká e kontenido di konsultanan. Den fase 3 ta momentu pa diálogo amplio i drenta barionan, tur esaki kompañá pa un kampaña di informashon i publisidat. Finalmente den e último fase di e trayekto akí ta tene presentashon dje resultadonan di e diálogo kaminda ta spera partisipashon di komunidat pasó ta Huntu i Integral ta trese solushonnan duradero.

Finalmente e trayekto aki mester kondusí na mas bienestar i desaroyo di henter komunidat di Kòrsou. Den kuadro di e strategia di kresementu (Groeistrategie) a planifiká un desaroyo sosio-ekonómiko duradero pa Kòrsou.

Ta bai kana e trayekto di konsulta for di e luna akí te den e di tres kuartal di 2019. Pa e motibu akí Minister Presidente Eugene Rhuggenaath ta hasi un yamada na tur organisashon i grupo den komunidat pa duna di nan parti i kompartí e tres proposishonnan mas prinsipal, pasó finalmente ta HUNTU nos por pensa i krea solushonnan integral i duradero pa nos Kòrsou.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: