SEMINARIO YU, MI RESPONSABILIDAT DIA 4 DI YÜNI 2019

SEMINARIO YU, MI RESPONSABILIDAT DIA 4 DI YÜNI 2019

 

Willemstad- ‘Yu, Mi Responsabilidat!’ ta un plan total pa mehorá e fluho di informashon rondó di e deseo di haña yu, paternidat responsabel i guia den edukashon di yu i mayor. Pa yega na un plan integral ta organisá un seminario di un dia, riba djamars 4 di yüni próksimo den sala Wayaka na WTC. Pa e okashon aki a invitá tur minister, ministerio, organisashon i fundashonnan gubernamental i no gubernamental, profeshonal i ekspertonan riba tereno médiko i di salubridat, direktiva i kabesantenan di skol i diferente organisashon i spesialista mas ku ta traha ku òf na interes di e gruponan di enfoke i temanan konserní.

E proyekto ‘Yu, Mi Responsabilidat!’  ta un inisiativa di señora Bianca Neman direktor di Be.advancement i den kolaborashon ku fundashon Youth Vision 5000 (YV5K), bou di presidensia di señor Ivan Kuster ta kordiná henter e proyekto.

‘Yu, Mi Responsabilidat! ta dirigí riba (futuro) mayornan pero tambe ekspertonan riba e.o. tereno di maneho, edukashon seksual, salubridat, embaraso i parto, paternidat, relashon entre mayornan i nan yu i edukashon di (futuro) mayor i yu. E proyekto ta enserá e.o. e responsabilidat di plania un embaraso konsiente i unabes ku a skohe pa trese un yu na mundu kuid’é, eduk’é i sòru pa su bienestar te ora e yu bai skol avansá. Mayornan ku tin yu kaba i ekspertonan riba e temanan ku lo trata tambe lo tin benefisio for di e proyekto aki.

Pa e seminario a aserká mas ku 250 organisashon i eksperto. No ta e intenshon pa inventá ningun wil i ta p’esei partisipashon aktivo i kolaborashon di e invitadonan ta importante pa kolekshoná e informashon i materialnan  nesesario. Ta e intenshon pa produsí video clip kòrtiku di tur tema stipulá, un app spesial, kuríkulo pa metanan edukativo, un kampaña di konsientisashon i den kolaborashon ku partnernan organisá workshopnan pa e.o. (futuro) mayornan. Aktualmente e proyekto ta konsistí di 20 kategoria i mas ku 250 tema.

Ku e seminario aki huntu ta logra dal un stap importante den konsientisashon i responsabilidat mutuo di mayornan i tur organisashon i spesialistanan embolbí den edukashon, kuido i desaroyo di un yu. E nesesidat pa huntu pone man na obra pa traha riba edukashon di (futuro) mayor i yu ta evidente. Importante ta pa organisashon, profeshonal i ekspertonan komprometé nan mes di traha huntu riba realisashon di e metanan stipulá.

E lugánan ta limitá. P’esei ta urgí tur invitado pa no warda te na delaster momentu pa inskribí. Pa e organisashonnan i òf spesialistanan ku pa un motibu òf otro no a haña invitashon pero ta deseá di kontribuí por manda un mail na be.advancement@gmail.com òf tuma kontakto ku Bianca na +5999 5122440. Den kaso ku sobra lugá por akomodá esnan interesá.

 

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: