Karta di parlamentario Curtley Obispo dirigi na Minister di Finansa señor Kenneth Gijsbertha ku topiko: Ehekushon di presupuesto 2019 Pais Kòrsou – kobransa di impuesto di sushi (“afvalstoffenbelasting”).

Minister di Finansa  

Señor Kenneth Gijsbertha

Pietermaai #17/Pietermaai 4-4A

 

Djaweps, 16 mei 2019

 

Tópiko:  Ehekushon di presupuesto 2019 Pais Kòrsou – kobransa di impuesto di sushi (“afvalstoffenbelasting”).

 

Apresiabel señor Minister Kenneth Gijsbertha,

 

For di 10 òktober 2010, nos Areglo di Estado di Pais Kòrsou (nos lei máksimo) ta indiká normanan finansiero pa finansa públiko di Pais Kòrsou den entre otro e artíkulonan 84, 85 insiso 2 i 4. Normanan finansiero di Pais Kòrsou kual ta indiká i ta basa riba ku tur kontribuyentenan di belasting tin ku kontribuí na tempu segun leinan di Pais Kòrsou pa asina na tempu por finansiá e gastunan kolektivo presupuestá di Pais Kòrsou. Tur esaki ku e meta pa sigui traha riba bienestar i progreso di henter nos Pais Kòrsou.

 

Deklarashon, pago i kobransa di impuesto di sushi sigur ta regla den e “Eilandsverordening regelende de heffing en de invordering van een afvalstoffenbelasting en van reinigingsrechten voor de dienstverlening door of vanwege de inzameldiensten  en tot wijziging van de Eilandsverordening leges, precariorechten en retributies Curaçao 1992. Esaki ta regla den e AB 1995 no. 48, zoals gewijzigd, ku e meta pa tur kontribuyentenan di impuesto di sushi paga e impuesto na tempu pa asina den Presupuesto di Pais Kòrsou di kada aña tin fondonan disponibel pa loke ta limpiesa i rekohementu di sushi aki na Kòrsou.

 

Pues pa ami komo parlamentario ta masha importante den kuadro ariba menshoná, mi trabou parlamentario pa sa kon ta atendiendo ku e punto pa loke ta trata un kobransa efektivo di impuesto di sushi. A base di mi plan di trabou di kontròl parlamentario, mi ta aserka Minister hasiendo uso di mi derecho komo parlamentario pa hasi pregunta nan konforme artíkulo  96 di Reglamentu di órden di Parlamento di Kòrsou:  

  1. Mi ta sita kontesta number 2 na mi persona di Minister di Desaroyo Ekonómiko di dia 7 mei 2019: “Aqualectra a bin ta kumpli ku e transferensianan na gobièrnu. Fin di 2017 e último transferensia a tuma lugá. E siguiente pago, ku lo mester a tuma lugá despues di e promé kuartal, no a wòrdu ehekutá. E pago di e di dos kuartal tampoko no a wòrdu ehekutá. Esaki en espera di un petishon hasi dor di Aqualectra na Minister di Finansa pa por “verrekenen” e saldo habri di Selikor ku kuentanan di awa i elektrisidat habri di gobièrnu mes. Den kaso ku awor akí lo mester ehekutá e pago, e montante ku lo por transferí na balor di NAf 6.7 mion”.

Preguntanan na Minister:

  1. Kua ta e status di e petishon aki? Mirando ku Pais Kòrsou tin mester di e transferensia di e entradanan di impuesto di sushi pa asina kumpli ku gastunan presupuestá?
  2. E petishon pa “verreken”aki ta konforme lei di Komptabilidat di Pais Kòrsou? E ta konforme lei di Admininstrashon di Pais i Sistema di kontabilidat efisiente (Financieel Beheer)? Si òf No. Dikon Si òf No?
  3. Kuantu ta e debe aktual di Pais Kòrsou na Aqualectra? Esaki no ta reserva kaba den e balansa finansiero di Pais Kòrsou pa asina por paga e debe di Aqualectra?
  1. Mi a hasi un análisis preliminar a base di: (a) kontesta number 1 di  Minister di Desaroyo Ekonómiko di e karta di dia 7 mei 2019, (b) e tarifa di 20 florin pa luna ku kontribuyentenan tin ku paga, (c) e entradanan di impuesto di sushi segun Rapòrtnan di Maneho Finansiero December 2014, 2015, 2016, 2017 i Aqualectra 2018. Pa mi análisis preliminar mi ta referí na anekso 1 di e karta aki.

 

A base di e análisis preliminar aki pa e periodo di añanan 2014 te ku 2018 mi ta yega na e siguiente  konklushon preliminar: kontribuyentenan di e impuesto di sushi a kontribuí pa e periodo aki ku solamente 29.5 mion florin di e total di 92.5 mion florin faktura dor di Aqualectra. Ku otro palabra,  e compliance, e pago, e kontribushon na gastunan kolektivo di sushi di Pais Kòrsou, a keda limitá na 31.9% di loke a wòrdu faktura dor di Aqualectra. Esaki ta mustra un phenomeno hopi preokupante kual tin ku wòrdu atendé ku un sentido di urgensia. Pa asina subi e “compliance” i asina garantisá ku tur i tur kontribuyentenan di impuesto di sushi ta paga nan faktura di impuesto di sushi i asina kontribuí na e gastunan kolektivo di limpiesa/rekohementu di sushi di Pais Kòrsou.

 

Preguntanan na Minister over di e periodo 2014 te ku 2018:

Artíkulo 7 insiso 7 di e lei di impuesto di sushi ta indiká ku “ De invordering van de afvalstoffenbelasting geschiedt overeenkomstig de voorschriften opgenomen in hoofdstuk II van de Invorderingsverordening 1954 (A.B. 1954 no.2).

    1. Kua ta instansia gubernamental responsabel segun lei pa e kobransa (“invordering”) di e impuesto di sushi?
    2. Dikon no a kobra (“invordering”) e impuesto di sushi a base di e lei ariba menshoná?

 

  1. Kuantu mion florin total Pais Kòrsou tin aktualmente riba kaya pa kobra di impuesto di sushi?

 

  1. Kua ta e akshonnan konkreto ku Minister lo laga ehekutá pa asina logra kobra e impuesto di sushi riba kaya te ku aña 2018  i tambe garantisá kumplimentu na tempu di tur kontribuyentenan di e impuesto di sushi vehíkulo pa loke ta e periodo aña 2019? Pa asina garantisá ku tur kontribuyentenan di impuesto di sushi ta kumpli ku nan deber pa ku Pais Kòrsou.

 

Atentamente,

 

Curtley Obispo

Parlamentario pa Kòrsou

PAR

 

Anekso:

  1. Análisis preliminar di pago i kobransa di impuesto di sushi over de e periodo di añanan 2014 te ku 2018.

Anekso 1: Análisis preliminar di pago i kobransa di impuesto di sushi over de e periodo di añanan 2014 te ku 2018.

 

Resúmen añanan 2014 te ku 2018

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: