Departamentu Edukashon Preskolar di SIGE ku enfoke speshalmente pa área di p’abou: Ripitishon di Siklo di Informashon Aminta Sprockel “Stimulashon Trempan den Bario”

Departamentu Edukashon Preskolar di SIGE ku enfoke speshalmente pa área di p’abou:

Ripitishon di Siklo di Informashon Aminta Sprockel “Stimulashon Trempan den Bario”

Willemstad – Aña pasá na luna di òktober Fundashon Sentro pa Inovashon i Guia Edukashonal (SIGE) su departamentu ‘Edukashon Preskolar’ tabatin seshonnan éksitoso i interesante komo parti di Siklo di Informashon Aminta Sprockel “Stimulashon Trempan den Bario”. E tópikonan tabata “Baby Brein”, ‘E proseso di relashon estrecho’, ‘Stima òf Malkriá’ i ‘Importansia di konsultorio di 0 pa 4 aña’. Despues di tantu petishon, SIGE ta anunsiá ku na luna di yüni lo tene e mesun siklo speshalmente pa área di p’abou. E oradónan di e charlanan lo ta neurosikólogo drs. Rodney Stewart, enfermera (O&G verpleegkundige) sra. Daisy Gijsbertha i dòkter di konsultorio drs. Atticus Wederfoort. E siklo di informashon ta dirigí riba mayor i edukadónan di nos komunidat. Na final di e siklo tur partisipante lo risibí un sertifikado di rekonosimentu i partisipashon serka SIGE.

Fechanan: djaweps 6, 13, 20 i 27 di yüni 2019
Lugá: Sentro di Bario Wishi/Marchena, na Wishi 224
Orario: 18:45 or’ pa 21:00 or’
Por registrá pa e siklo aki te ku: djabièrnè 31 di mei. Tene na kuenta ku lugánan ta limitá.
Kontribushon: Fl. 5,-
Idioma: Papiamentu

E departamentu Edukashon Preskolar di SIGE tin e meta prinsipal di kontribuí na desaroyo positivo di tur mucha, na un edat mas trempan posibel, di akuerdo ku nan potensial. Tin atenshon general pa tur mucha, pero tin tambe atenshon speshal pa muchanan ku enkontrá un òf otro tipo di retraso den nan desaroyo. Den e kuadro aki e departamentu Edukashon Preskolar ta ofresé sosten i guia kontinuamente na mayor i edukadónan, ya ku nan ta konvensí ku speshalmente e mayor tin un ròl primordial den desaroyo diario di su yu.

Pa registrá i paga kontribushon por pasa libremente na SIGE, na Groot Davelaar 22-23, di djaluna pa djabièrnè, entre 8:00 or’ pa 12:00 or’ i 14:00 or pa 17:00 or’.

Sentro pa Inovashon i Guia Edukashonal (SIGE)
SIGE tin komo meta e preparashon, desaroyo i implementashon di e maneho pa ku inovashon i mehorashon di e nivel di enseñansa i edukashon di Pais Kòrsou. Den kuadro di e maneho aki, SIGE ta duna sosten na tur aktor den e vèlt di enseñansa i edukashon pa por alkansá optimalisashon i inovashon. SIGE ta kumpli ku e tarea aki dor di konsehá, guia, sostené i duna treinen pa ku asuntunan pedagógiko, didáktiko i di estudio.

SIGE ta hasi un yamada na tur mayor i edukadó di Kòrsou, pa asistí i eduká nan mes pa ku e importansia di stimulashon trempan. Pa kualke pregunta por yama na number di telefònnan 843 2700 òf 738-6570.

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: