Sentro di Bario Montaña ta selebrá 45 aña di eksistensia

Sentro di Bario Montaña ta selebrá 45 aña di eksistensia

 

Historia………..

Den añanan 50 te mas o ménos 60 tabatin “buurtvereniging” i no “buurtcentrum”. Buurtvereniging den e tempu ei tabata bou di direkshon di sr. Smuelders (d.f.m.) ku tabata traha na St. Dominicus School, ku awe ta Kolegio San Dominico.

Na aña 1966 sr. Smuelders (d.f.m.) a pidi sr. Edmundo Bernadina pa kuminsá sondia den bario algun persona ku ta interesá pa traha trabou di organisashon sosial i kultura. Di e manera aki sr. Elsio Solassa, sr. Edmundo Bernadina i sr. Wilson Garcia a forma e promé direktiva. Djei nan a sigui buska mas persona den bario ku tabata interesá, i na 1974 nan a lanta e direktiva ku tur su komishonnan.

Trabounan a kuminsá den e mes un temporada. Presidente na aña 1974 i fundador di e edifisio tabata sr. Solassa, sr. Shon Statia (q.e.p.d) i sr. Edmundo Bernadina. Promé sekretarianan den e tempu ei tabata sra. Ana Rafaela – Lugo i Yùfrou Bigala Cicilia.

Kon nos a yega na e edifisio?

Durante un grandioso feria, ku a organisá a pone e promé piedra i despues di un lucha grandi Buurtcentrum Montaña a habri su portanan. Pastor Julio Henriquez (d.f.m.) a bendishoná e edifisio. Despues ku Stichting Buurtcentrum Montaña a afiliá ku FESEBAKO, e nòmber a kambia i bira Sentro di Bario Montaña, ku ta un nòmber mas moderno.

Awe nos ta para dilanti di un edifisio kaminda nos ta purba riba propio forsa huntu ku empresanan i habitantenan ku ta kere den nos organisashon i ta siguí duna nos un man pa nos por siguí mantené e sentro habri.

Nos lo tin un skema ku nos lo bai repartí di tur e aktividatnan ku lo bai siguí e próksimo lunanan den e sentro , pa nos kana yega e 45 aña di eksistensia di e Sentro di Bario Montaña.

Nos promé aktividat lo start djadumingu awor 26 mei 2019 ku un marshe di salu di 9’or mainta pa 2’or mèrdia, ku lo hiba di tema “ KON MANTENE NOS SALU DEN NOS BARIO”, Dòkter di kas Yves Schoop, lo bai elabora riba diferente topiko. Lo tin diferente stent entre otro : Stichting Wit Gele Kruis, Martijn Trading, Charla di Sokudi,  Fundashon Alzheimer, Popular Agencies, Fundashon Skuchami, SVB, Extura i hopi mas. Nos huki pa mucha ku hopi wega atraktivo. Tur esaki pa un preis simbóliko di fl. 1,00 general . E fondo rekoudá ta bai pa nos siguí traha pa e grandinan ku ta den nos sentro tur djamars i djarason.

Nos di dos aktividat ta 9 yüni 2019,  9’or mainta pa 2’or mèrdia, nos bazar pa bario ku lo hiba di Tema : “BAN YUDA BO MES, PA OTRO YUDABO.”, kaminda lo bai tin mas di 25 stent ku lo bende tantu kos segunda mano i kos nobo . Esaki ta den kuadro di nos ekonomia ku no ta masha stabil i kaminda nos ta duna oportunidat na tur hende di bario pa bin bende loke nan por saka algu for di dje.

Dia 11 yüni 2019 nos lo tin e selebrashon kaminda nos lo duna honor na 2 hóben prospekto di nos sentro di bario. Paso nos direktiva ta kere den duna nos hóbennan e oportunidat.

Di tres aktividat lo ta nos Tradishonal Plan di Fakansi  ku e tema : “BAN YENA NOS BIDA KU KOLO POSITIVO”. E ta pa tur mucha di 5 pa 15 aña. I pa sera nos fiesta nos lo organisá un feria grandi pa bario dia 3 ougùstùs 2019, di  11’or mainta pa 5’or atardi. Kaminda nos lo bai tin hopi wega pa mucha i hende grandi .

Nos lo ke invitá tur hende pa bin selebrá huntu ku nos e aktividatnan den kuadro di  selebrashon 45 aña di Sentro Bario Montaña. Nos lo keda informá pueblo di Banda Riba i Kòrsou di nos aktividat nan den kuadro di selebrashon 45 aña SB Montaña.