Komité organisadó di Global Entrepreneurship Week Curaçao ta kompartí premio internashonal ku su partnernan

Willemstad: 23 di Mei 2019

Komité organisadó di Global Entrepreneurship Week Curaçao ta kompartí premio internashonal ku su partnernan

WILLEMSTAD – Djaweps atardi e komité organisadó di Global Entrepreneurship Week (GEW) Curacao a kompartí e premio internashonal ku GEW Curaçao a risibí durante di e kongreso anual mundial di Global Entrepreneurship Network ku su partnernan. E evento a tuma lugá na Academy Hotel Curaçao kaminda representantenan di diferente organisashon ku a duna un aporte na realisashon di e ‘siman’ pa stimulá hasimentu di negoshi na Kòrsou i ku mundu.

Global Entrepreneurship Network (GEN) ta un organisashon mundial na kua 170 pais ta afiliá. Un di e proyektonan di GEN pa stimulá ‘entrepreneurship’ ta pa motivá ku tur país afiliá na GEN durante un siman den luna di Novèmber ta tene aktividatnan pa duna kontenido na e obhetivo menshoná.

Na 2014 GEN a otorgá lisensia na Fundashon Negoshi Pikiña pa hasi trabounan pa realisashon di e siman empresarial (GEW). Riba e atardi ameno den sentro di Punda, Sra. Elgenia Pieternella, presidente di GEW Curaçao, a dirigí algun palabra na e invitadonan presente. El a informá en breve kon e trayekto di GEW Curaçao a tuma lugá di 2014 te 2018. Alabes el a informá kon el a ser sorprendé na e kongreso mundial di GEN, ku e aña aki a tuma lugá na Bahrain, Medio Ortiente, ku e grato notisia ku Kòrsou a gana e premio Champion Catalyzer Award for most partners per Capita. Ku ta nifiká ku, basá riba e kantidat di hende ku ta biba na Kòrsou, GEW Curaçao a logra koperashon di mas partner durante di su Global Entrepreneurship Week. “Nos partnernan no ta solamente organisashonnan ku a aportá ku sèn, pero tambe esnan ku a sostené nos di asina tantu otro forma, ku a hasi posibel ku nos por a hasi e ‘siman empresarial’ un realidat. Un eksito si tuma na kuenta ku nos a gana e premio asina kotisá< Algu ku ta duna muestra ku si nos uni forsa nos por logra hopi.”

Alabes a hiba palabra sr. De Sola, den representashon di MCB i e sektor komersial, sr. Martina direktor di Rooms Katholiek Schoolbestuur, den representashon di mundu di enseñansa, sr. Edwin Loran, empresario – diseñadó di moda, sr. Betrian direktor di Stichting Johannes Bosco.  

Despues tabatin oportunidat pa e invitadonan presente saka fotonan den grupo ku e premio ‘Champion Catalyzer Award for most partners per Capita’.

Global Entrepreneurship Week pa aña 2019 ta stipulá pa tuma lugá di 18 pa 24 di Novèmber. “Nos ta spera ku e aña aki nos por bolbe konta ku sosten di partnernan di último añanan, pero ku nos por yama bon biní na mas partner pa asina e focus mundial keda riba Kòrsou. Huntu  forsa nos por logra kosnan grandi pa nos pais. I si nos ke, nos por,” sra. Pieternella a klousurá e parti ofisial bisando.