Seshon di Multi Stakeholder: Forma e Futuro di Klein Kòrsou

Seshon di Multi Stakeholder: Forma e Futuro di Klein Kòrsou

Willemstad – Gobièrnu di Kòrsou a organisá un seshon ku vários stakeholder riba 21 di ougùstùs último. Durante e workshop aki mas ku 40 stakeholder a eksplorá i kompartí ideanan tokante e futuro di Klein Kòrsou komo área di importansia internashonal bou di Konvenshon di Ramsar. Gobièrnu di Kòrsou tin komo meta pa preservá e status ekológiko di Klein Kòrsou komo Ramsar dor di implementá e inisiativanan ekonómiko nesesario ku ta kondusí na un uso kondishoná ku konservashon di patrimonio natural i kultural basá riba desaroyo sostenibel.

E proyekto a kuminsá na aprel di e aña aki i lo dura un aña. Te awor e tim di e proyekto a organisá na nòmber di e Gobièrnu di Kòrsou vários workshop i presentashon ku a konektá diferente departamento gubernamental; Ministerio di Desaroyo Ekonómiko (MEO), Ministerio di Tráfiko, Transporte i Planifikashon Urbano (VVRP) i Ministerio di Salubridat, Medio Ambiente i Naturalesa (GMN), i gruponan di stakeholder manera operadónan Turístiko, NGOs, piskadónan, sektor di turismo i  marítimo.

Komo parti di esfuersonan kontinuo, e tim di proyekto a ehekutá un analisis ámplio di e ‘gaps’, pa asina por a planifiká aktividatnan ku enfoke riba maneho operashonal di Klein Kòrsou, basá riba un plan di maneho aprobá. Tur stakeholder, sin importá nan órigen òf interesnan, por a kompartí nan ideanan i pensamentunan liberamente tokante futuro di Klein Curaçao. E enfoque aki a permití nos benefisiá di ekperensia kolektivo di e partnernan i generá ideanan nobo mientras ku ta forma un futuro optimal pa Klein Kòrsou.

E puntonan mas relevante di e workshop ta, pa loke ta trata e konservashon di Klein Kòrsou, e partisipantenan a diskutí tokante asuntunan natural i sosial ku mester ser monitoriá, inkluyendo e ref di koral, avifauna, reprodukshon di tortuga i vegetashon. Tambe a presentá otro tópikonan manera erosión i dinámika di sedimento di playa i paisahe di refnan, tambe den bista di kambio di klima. A diskutí kon pa apliká i implementá resultadonan di investigashon i monitoreo den maneho di e isla, ku un énfasis fuerte riba regulashon i ehekushon. Tambe a diskutí e deseo, nesesidat i posibilidat di programanan di restorashon, por ehèmpel pa e ref di koral.

Pa loke ta trata e tema di herensia kultural, tur e partinan interesá a yega na un akuerdo ku e faro mester keda restaurá. E funshon nobo di e kasnan di e esnan ku a mantené e faro mester ta habrí pa tur bishitante, manera un museo chikítu òf un sentro di informashon. E bishitante mester por sinti i balorá e ambiente natural i kultural. Mester usa medionan sosial mas biaha. Ideanan interesante relashoná ku desaroyo i futuro di Klein Kòrsou ku lo ser investigá mas den detaye ta un tarifa di entrada (similar na

Christoffelpark) i otro fuentenan di entrada pa finansiá e konservashon i otro esfuersonan planiá i pa mantené e isla.

Otro ideanan ku lo investigá mas leu ta aktividatnan ekonómiko ku por ofresé trabou, entrada p’e piskadó i akseso aseptabel pa lokalnan. Ku bo ta inspirá p’e sugerensianan aki i ke sa mas tokante e proyekto, bishitá e website http://www.kleincuracao.cw i laga un mensahe pa kompartí bo pensamentunan. Esaki ta un proyekto apoyá pa Union Europeo su programa Resilience, Sustainable Energy, Marine Biodiversity (RESEMBID). E programa RESEMBID tin komo meta pa fasilitá esfuersonan di desaroyo duradero den e 12 paisnan i teritorionan Karibense. E “Plan di Desaroyo pa Ramsar Wetland di Importansia Internashonal #2355: Klein Curaçao” ta wòrdu liderá pa Ministerio di GMN.