Liderazgo polítiko t’e abilidat pa duna direkshon sin tin posishon
Liderazgo polítiko t’e abilidat pa duna direkshon sin tin posishon
Bindishoná t’e pueblo ku logra desifrá kua mensahe polítiko lo duna fruta di bèrdat.
Willemstad — Sin sa ken a tuma e inisiativa, Partido PIN ta kontentu ku e universidat lokal UDC, a publiká resultado di su enkuesta ku a midi popularidat di lidernan polítiko. Si konektá e grado di konfiansa bastante altu den Suzy Römer ku e diferente inisiativa- i ideanan di Partido PIN ku ta keda ehekutá p’e gobièrnu aki, mester konkluí ku e direkshon i liderazgo polítiko di Partido PIN ta di buena fe, duradero i fruktífero.
Broyo, envidia i spantu
Pa evitá mas broyo den nan mes organisashon, pa promé biaha den historia polítikonan ku a skor di mas altu riba e skala di konfiabilidat a sali nenga nan mes popularidat. Alabes, sea pa envidia òf spantu, nan mes a tira duda riba e enkuesta i esun ku a ehekut’e. PIN, ku pa su ideologia humanista kristian, ta duna balor na dato i investigashon, ta apuntá ku tur enkuesta ta un ‘momentopname’. Sinembargo, si midi liderazgo polítiko den e kantidat di ideanan ku ta haña ehekushon, ta opvio ku Partido PIN su liderazgo ta di buena fe, duradero i fruktífero.
Hechos
- Partido PIN pa kuminsá ta aploudí ku den e siman último minister Cijntje, aunke ku un tiki tardansa, ku madures i apresio pa nos agrikultornan a kompletá e inisiativa di sra. Camelia-Römer pa ofresé agrikultornan awa mas barata di Aqualectra mes.
- Pa mas ku un aña kaba PIN ta papia di un kumbre nashonal riba temanan importante. Den siman ku a pasa un sentral sindikal a rekonosé e nesesidat i a lansa e idea pa un kumbre spesífikamente riba refineria i Bullenbaai.
- Ora ku sr. Pisas den un pániko a grita ku mester aseptá COHO paso ta anglo i infrou su nos pais ta produsí i ku nos mester paga e debe di Covid bèk, Partido PIN i su lider, kasi komo e úniko, a insistí riba un Onderlinge Regeling i refinansiamentu suave dje debe. Awe nos tin esei nan.
- Apesar di no ta un lucha politiko den ningun forma, praktikamente komo úniko polítiko aktivo konektá n’e lucha pa reparashon i reabilitashon di Tula, e lider di PIN a tende fo’i tur skina ku e hanchi ei ta un sin salida. Awe Kòrsou tin for di boka di Kas Real i gobièrnu Hulandes, un dispensa i e promé indikashon di reparashon konkreto pa sklabitut.
Madures
Meskos ku un panadero ta traha pan i un metslá ta pega blòki, un polítiko ta hasi polítika. Sinembargo, e meta mester ta pa bo polítika ta na benefisio dje komunidat ku bo ta sirbi. Den e sentido ei atrobe Partido PIN ta pidi esnan enbolbí pa nevermind terkedat i pone mas atenshon riba prevenshon di malesa. Tambe PIN ta probechá e oportunidat pa kòrda presidente di parlamento ku ainda e tin un reunion di yama riba kanabis medisinal.
Kon ku bai bin, na final di dia liderazgo mester pari fruta pa komunidat
