Prome Minister Evelyn Wever-Croes: PROME MINISTER TA NA HULANDA PA VARIOS REUNION RIBA E TOPICO VENEZUELA
Prome Minister Evelyn Wever-Croes:
PROME MINISTER TA NA HULANDA PA VARIOS REUNION RIBA E TOPICO VENEZUELA
Lo presenta e plannan di Aruba y e gastonan envolvi pa asina logra pa Aruba haya financiamento
Dialuna y diamars, Prome Minister Evelyn Wever-Croes lo tin varios reunion na Hulanda na unda e topico principal lo ta Venezuela. Despues di reunionnan na Washington, unda cu Prome Minister a hiba varios reunion hopi importante tocante e crisis migratorio di Venezuela y e impacto cu esaki tin pa e islanan den nos region mas cerca di Venezuela, e mandatario principal di nos pais awo ta na Hulanda pa trata e mesun topico aki riba nivel di Reino. Minister Plenipotenciario na Hulanda, Guilffred Besaril lo compaña Prome Minister den e reunionnan na Hulanda.
E topico prinicipal di su reunionnan na Hulanda lo ta Venezuela. E Premier di Aruba lo delibera cu Premier Mark Rutte, Secretario di Estando Raymond Knops y Raad van State riba e impacto grandi di e crisis di Venezuela riba nos pais. Prome Minister lo presenta e plan cu Aruba tin pa por atende cu e migracion masal cu ta tumando luga desde Venezuela.
Tambe Prome Minister lo reuni cu e comision di Reino den Eerste y Tweede Kamer riba tres topico: Venezuela, integridad y finansas publico. “Ta importante pa nan scucha di mi con e situacion ta y unda nan tambe por yuda”, Prome Minister a expresa.
Aruba y Corsou ta e paisnan cu ta carga mas peso di e impacto di e crisis migratorio di Venezuela. Ambos pais a experiencia un migracion di Venezuela enormemente grandi. Esaki ta pone un presion grandi tambe riba nos comunidad. Teniendo cuenta cu Gabinete Wever-Croes a hereda un situacion di e pais sumamente dificil, ta haci tambe cu ta hopi dificil pa atende cu e crisis migratorio. Situacion financiero hopi critico, explocion social, negligencia den enseñansa ta situacionnan critico cu Gabinete Wever-Croes a hereda. Y mientras cu mester pone tur atencion pa atende cu esakinan, Gobierno mester pone atencion pa atende cu un crisis cu ta di un otro pais causa door di otro hende. Pa e motibo aki, Prome Minister ta considera ta momento pa bay Hulanda, splica e situacion manera cu e ta, pa asina haya mas comprension di Hulanda y pa nan dicidi tambe pa yuda den esaki, cu confiansa di ta exitoso na Hulanda y por yega na cualkier areglonan cu por ta posibel.
“E impacto di e crisis di Venezuela riba nos pais ta hopi grandi, y ta hopi importante pa Parlamento y Gobierno hulandes tambe ta na altura di esaki. E crisis di Venezuela no ta un crisis di Venezuela so, of un crisis regional so, e ta un crisis mundial. Aruba y Corsou ta wordo considera como e dos paisnan cu ta wordo afecta mas severamente y sin cu nos ta haya ayudo financiero di ningun banda. Esaki no ta un situacion cu nos a crea, pero nos ta wanta e golpinan si. Ta momento pa Reino y pa comunidad mundial comparti e peso aki y no bira cara y keda sin yuda den e crisis aki,” Prome Minister a enfatisa.
Den reunionnan cu mandatarionan Hulandes, Prome Minister lo presenta e plannan di Aruba y e gastonan envolvi pa asina logra pa Aruba haya financiamento. Prome Minister a expresa di ta spera cu esaki lo e haya comprension di Parti di Hulanda y nan yuda cu e peso aki pasobra Aruba so no por carga e peso aki mas den nos region.
