Dikon tin ku deliberá riba e situashon finansiero di Pais Kòrsou?

Dikon tin ku deliberá riba e situashon finansiero di Pais Kòrsou?

Parlamentario Curtley Obispo den e reunion di Komishon Sentral di Parlamento di Kòrsou di dia 31 mei 2019, a mustra riba e diferente motibunan dikon tin ku deliberá riba e situashon finansiero di Pais Kòrsou. Ta promé biaha e aña aki ku Parlamento di Kòrsou ta deliberá ku Minister di Finansa, señor Kenneth Gijsbertha, riba ehekushon di presupuesto di Pais Kòrsou. Den e kaso aki a base di e Rapòrt di Maneho Finansiero/Ehekushon Pais Kòrsou pa loke ta trata e promé 3 lunanan di aña 2019. Pa asina tambe sa kon leu ta ku e diferente metanan stratégiko pa ku finansa públiko di Pais Kòrsou.

Metanan stratégiko segun Parlamentario Curtley Obispo pa loke ta trata entre otro:  

(1) yega na un “bestuurlijk overleg” ku palabrashonnan konkreto entre Gobièrnu di Kòrsou i Gobièrnu di Reino Hulandes. Esaki basa riba e 3 konsehonan balioso di e: (a) e rapòrt di Algemene Rekenkamer di Hulanda titulá: “Resultaten verantwoordingsonderzoek 2018 Koninkrijksrelaties (IV) en BES-fonds (H). Rapòrt bij het jaarverslag i (b) e rapòrt di dia 5 desèmber 2018 di e Komishon di evaluashon di e Lei di Reino di Supervishon Finansiero Paisnan Kòrsou i Sint Maarten. Rapòrt ku e titulo: “Steunend op eigen kracht, maar met de wil elkander bij te staan”.

(2) sa kua ta e pasonan firme i konkreto ku Gobièrnu di Kòrsou ta tumando pa asina logra: (a) garantisá entradanan struktural di belasting na tempu di kontribuyentenan pa asina na tempu por finansiá strukturalmente gastunan kolektivo di aña 2019 i (b) sigui mehorá e atministrashon di Pais i e sistema di kontabilidat efisiente (“financieel beheer”);

(3) pa den aña 2019 logra: (a) di será e siklonan di presupuestonan 2014 te ku 2018 di Pais Kòrsou dor di fiha kuentanan anual 2014 te ku 2018 den aña 2019, (b) reforsá e kolumna finansiero di Gobièrnu di Kòrsou ku e Direktornan finansiero, Controllers i Internal Auditors i (c) ku tur kompania i fundashonnan di Pais Kòrsou, instansianan derivá di lei i órganonan di estado duna kuenta i rason na tempu ku nan kuenta anual (“jaarrekening”) 2018;

(4) sigui mustra i konsientisá nos Pueblo di Kòrsou riba e importansia di sivismo fiskal. Ta tur kontribuyente di belasting for di 10 òktober 2010 segun leinan di Pais Kòrsou mester kontribuí ku nan aporte di belasting na tempu, pa asina por finansiá i garantisá na tempu e gastunan kolektivo di Pais Kòrsou;

(5) Pa si Gobièrnu di Kòrsou a kumpli ku tur e palabrashon nan di dia 17 òktober 2018 entre Gobièrnu di Kòrsou i e Kolegio di Supervishon Finansiero Paisnan Kòrsou i Sint Maarten.