Sembra awe pa kosechá mañan?
Komunikado di Prensa, Alsa Papiamentu
Willemstad, 4 yüni 2019
Sembra awe pa kosechá mañan?
M’a tende sr. Billy Jonckheer 28 di mei 2019 na Telenotisia. E ta bisa “ku un alumno no tin mag di
keda sin bai HAVO pa motibu di Papiamentu‘. Mi a lesa den Antilliaans Dagblad den un artíkulo titulá
“Focus op wereldtalen” ku Segun KvK Papiamentu te FO ta ok, pero e no mester ta obligatorio
despues di skol básiko.
Ta bon pa indiká kiko e situashon ta awor segun nos leinan. Un direktiva di skol por disidí awendia kua
lenga e ta skohe pa laga su skolnan duna lès den dje. E lenga ku e por disidí pa su skolnan duna lès den
dje TA E LENGANAN OFISIAL DI KÒRSOU, ESTA Papiamentu, hulandes òf ingles. Un skol hasta
por disidí pa ofresé programanan bilengual, ku papiamentu/hulandes òf papiamentu/ingles komo lenga
di instrukshon. No tin skol ainda ku ta duna lès solamente den ingles, pero lei no ta ekskluí ni prohibí
esaki. E leinan akí ta konta tantu pa skol básiko (FO) komo pa skol sekundario (VSBO/SBO i
HAVO/VWO).
Esaki ta indiká ku tin un grado di igualdat den enseñansa entre e 3 lenganan ofisial di nos pais: esta
Papiamentu, Hulandes i Ingles. Un hende ingenuo lo hasta por a bisa: porfin nos a duna kontenido na
multilingualismo i (no?) tin desigualdat entre e lenganan ofisial di Korsou den edukashon.
Si bo weta bon sinembargo, hulandes ta privilegiá ketu bai. Direktiva di skol protestant a skohe pa duna
lès den hulandes so. Nan no tin skol bilengual. Esaki tambe ta konta pa skolnan atventista. Skolnan
katóliko tin un 8 skol ku un grado di bilingualismo, esta ta alfabetisá na Papiamentu pero ta sigui
despues ku lès na hulandes. Sobrá skolnan katóliko ta duna lès na hulandes. Na skolnan públiko tin 2
skol ku ta duna lès na hulandes i sobrá skol públiko tin programanan mas o ménos bilingual
papiamentu/hulandes. Direktiva di skolnan SCONS i FSHP ta e úniko direktivanan di skol ku ta brinda
programanan bilingual papiamentu/ingles. Ke men na mayoria di skol tur materia (ku eksepshon di
Papiamentu) ta keda duná na hulandes i e eksamen final, tantu na FO, komo na skol sekundario, ta den
hulandes. Papiamentu ta un materia obligatorio na tur skol, sea ku e skol ta duna lès na Papiamentu, na
hulandes òf na ingles.
Ta kiko porlotantu Billy Jonkheer ke pa gobièrnu kambia? Duna Papiamentu si pero sin lag’é konta
komo materia obligatorio na fin di skol básiko den Eindtoets Funderend Onderwijs (EFO=
gecoordineerde proefwerk)? I na skol sekundario laga e studiante skohe si e ke haña Papiamentu den su
pakete? Mi konklushon ta ku loke e ta bisa ta realmente “Manda Papiamentu kas bèk”. No laga pa e tin
influensha den e mucha su karera eskolar.
Pero Billy Jonckheer ta lubidá ku nos pais tin 3 lenga ofisial i ku un di nan ta Papiamentu. I ku lei ta
obligá gobièrnu pa trata tur e lenganan di su pais komo lenganan ku tin e mes balor.
Konsekuensia di loke KdK i Billy Jonckheer ta trese dilanti ta sembra atrobe e simia di desigualdat pa
kosechá mañan mas falta di rèspèt pa nos lenga materno? Pasobra si Papiamentu no ta importante tòg
pa e mucha bai ofer, ke men ta balapena mes pa e haña lès den dje? Si e tin ku skohe si e ta haña lès
den su mes lenga, miéntras hulandes i ingles si ta obligatorio, kon ta para ku igualdat i dominio di bo
mes lenga? Kua pais ta duna lenga straño mas balor ku su mes lenga? E mayoria di habitantenan di
Kòrsou ku ta papia Papiamentu nan lenga no ta den enseñansa, miéntras nan tin ku siña lenganan
stranhero, sin ku nan ku nan a haña un base den nan mes idioma. I investigashonnan na henter mundu
ta bisa ku bo no por doimná un lenga straño si bo no ta dominá bo propio lenga bon.
Finalmente nos ta keda atras komo pueblo ku ta papia papiamentu na kas i na skol ta bai siña hulandes
malu i for di hulandes ta bai siña ingles malu.
Sembrando esaki Jonckheer i KdK nunka lo no por kosechá nada, ni ayera, ni awe, ni mañan.
Dr. Marta Dijkhoff, lingwista i presidente di Instituto Alsa Papiamentu
