Mester sa e bèrdatnan di Stichting Wegenfonds Curaçao!
Mester sa e bèrdatnan di Stichting Wegenfonds Curaçao!
Parlamentario Curtley Obispo den e reunion di Komishon Sentral di Parlamento di Kòrsou di dia 3 yüni 2019, a indiká bon kla i raspa ku e ke sa e bèrdatnan di Stichting Wegenfonds Curaçao for di 1 Yanüari 2011. Mester sa e bèrdatnan a base di entre otro: (a) kuentanan anual 2011 te ku 2018 i (b) rapòrtnan di SOAB i Kontrolaria General di Kòrsou i (c) nan atministrashon di proyektonan. Mester sa tur e bèrdat nan promé ku e aktual Gobièrnu di Kòrsou a sinta riba 29 mei 2017. I tambe kon e aktual Gobièrnu di Kòrsou ta atendiendo ku Stichting Wegenfonds Curaçao. Ta p’esei parlamentario Curtley Obispo a hasi 7 pregunta konkreto tokante Stichting Wegenfonds Curaçao na Minister di Tráfiko, Transporte i Planifikashon Urbano, señora Zita Jesus Leito:
1) Kiko ta e status aktual di Stichting Wegenfonds Curaçao?
2) Ken ta direktor di Stichting Wegenfonds Curaçao?
3) Ken ta forma parti di Raad van Toezicht di Stichting Wegenfonds Curaçao?
4) Kuentanan anual (“jaarrekening”) di Stichting Wegenfonds Curaçao di aña 2011 te ku aña 2018 ta kla?. Petishon pa risibí di Minister e kuenta nan anual di aña 2011 te ku 2018. Si tin kuenta anual ku no ta kla, mi tabata ke sa e motibunan dikon esakinan no ta kla?
5) Tin overzicht di proyektonan ehekutá for di 1 yanüari 2011 te ku 31 desèmber 2018?. Mi ke risibí di Minister un overzicht over di aña 2011 te ku 2018 di tur proyektonan ehekutá dor di Stichting Wegenfonds Curaçao. Pues un overzicht ku 4 kolòm di kada proyekto ehekutá anja 2011 te ku 2018meshonando: nòmber di proyekto, montante, deskripshon di e proyekto i meta di e proyekto;
6) Tin un rapòrt di SOAB ku fecha 12 òktober 2012 ku tópiko: “Rapport van feitelijke bevindingen inzake financieel onderzoek Stichting Wegenfonds”. A base di e investigashon di SOAB a konstatá diferente kos. Pregunta na minister a base di e rapòrt aki: ta kua ta e medidanan ku a tuma entrante 13 òktober 2012 te ku 28 mei 2017 pa loke ta e parti di atministrashon di proyekto di Stichting Wegenfonds Curaçao?
7) Rapòrt di Kontrolaria General di Kòrsou titulá: “Subsidie Risicomanagement van de overheid op de financiële positie van de gesubsidieerde instellingen”. Un investigashon entre 10 òktober 2010 te ku 31 desèmber 2015. I un rapòrt basa riba un moshon di Parlamento di Kòrsou. Den e rapòrt aki Kontrolaria General di Kòrsou a duna komo konseho: “Hala atenshon di Gobièrnu na e echo ku mester finalisá e trayekto di restrukturashon di Stichting Wegenfonds Curaçao mas lihé posibel pa por disidí ki direkshon lo tuma definitivamente pa loke ta trata e fundashon akí”. Pregunta na Minister ku si a logra finalisá e restrukturashon aki promé ku 29 mei 2017? Si òf No. Dikon Si òf No?.
