Tema: Polushon di Airu Dia 5 di yüni ta Dia di Medio Ambiente 2019
Tema: Polushon di Airu
Dia 5 di yüni ta Dia di Medio Ambiente 2019
Willemstad – Nashonnan Uní a proklamá un dia Internashonal di Medio Ambiente na okashon di apertura di e konferensha tokante “Human Environment” na Stockholm na aña 1972. For di e tempu ei mundu ta selebrá Dia di Medio Ambiente riba 5 di yüni. Ku esaki UNEP (United Nations Environment Programme) ke generá atenshon mundial p’e problemátika di medio ambiente i alabes hala atenshon di polítika mundial ku t’esun ku mester sòru pa lei, alternativanan i medidanan pa protehá medio ambiente. Rònt mundu prensa tambe ta pone atenshon riba problemátika di medio ambiente riba Dia di Medio Ambiente den forma di artíkulo den korant, dokumentario na televishon i entrevistanan na radio.
E aña aki UNEP a skohe komo tema Polushon di Airu. Polushon di airu ta tuma lugá di diferente forma. Na nivel mundial e lokualnan ku ta okashoná mas polushon di airu ta entre otro; kimamentu di karbon òf hidrokarburo pa produsí koriente, emishonnan di outonan, solventenan por ehèmpel den fèrf, kimamentu di selva na gran eskala pa produsí zeta di palma, industria i e polutor di airu di mas grandi na mundu kual ta sektor di agrikultura prinsipalmente kompanianan gigantesko di krio di bestia. Último añanan nos a kuminsá eksperensha un otro fuente di polushon di airu kual ta Sargassum, ku momentu e kuminsá putri e ta emití H2S (Sulfuro di Hidrógeno). Esaki ta polushon di airu okashoná pa naturalesa.
Na Kòrsou Ministerio di Salú tin diferente instrumento pa atendé ku polushon di airu. Pa kuminsá tur persona ku kuminsá ku un aktividat komersial mester di un Pèrmit di Molèster den kua tin kondishonnan formulá pa protehé medio ambiente. Banda di esei Ministerio a hasi invershonnan grandi pa midi kalidat di airu p’abou di tereno industrial di Schottegat. Relashoná ku esaki lo bini kondishonnan tambe pa refineria uza gas komo kombustibel na lugá di e asina yama “pitch” pa evitá emishon di SO2 den airu. Riba tereno di produkshon di energia tambe Kòrsou a mira adelanto supstansial. Awendia ku e parke di mulina nobo den operashon alrededor di 30% di e total energia ku Aqualectra ta produsí ta bèrdè. I naturalmente nos ta mirando mas i mas outo di koriente riba nos kayanan kual tambe ta sòru pa redukshon di emishonnan den airu for di sektor di transporte. Tumando tur e aspektonan aki na kuenta, por bisa ku un isla chikitu manera Kòrsou tin un kaminda largu ainda pa kana, pero nos ta moviendo den bon direkshon.
Ministerio di Salú, Medio Ambiente i Naturalesa ta pidi henter komunidat pa para ketu riba e dia aki, reflekshoná i bira konsiente di kada akshon ku nos ta hasi ku tin konsekuensha pa nos kalidat di airu. No malgastá koriente i kore outo di forma konsiente. Kòrdá ku kiko ku bo hasi ku ta bon pa medio ambiente, ta konta!
