ARUBA: TRES SOSPECHOSO DETENI RELACIONA CU INVESTIGACION DI PORNO INFANTIL

TRES SOSPECHOSO DETENI RELACIONA CU INVESTIGACION DI PORNO INFANTIL

For di cooperacion internacional entre cuerponan di investigacion criminal na diferente pais a resulta cu tin varios usuario di IP-adres na Aruba (aansluitingnan di Internet) cu ta envolvi den download y plama porno infantil.

Jeugd- en Zeden Politie (JZP) y Recherche Samenwerkings Team (RST) a haci investigacion den e lunanan cu a pasa na e adresnan di IP Arubiano aki.

E investigacion a hiba te awor na detencion di tres sospechoso, cu pendiente e curso di e investigacion lo keda deteni preventivamente.
E investigacion ta den full swing y no por exclui cu lo cay mas detencion.

Esaki ta e prome biaha cu ta tuma lugar na Aruba un investigacion planifica di porno infantil.
Abuso seksual di menornan di edad mester wordo bringa y tambe exploitacion digital di e tipo di abuso aki.
Posesion intencional di porno infantil y plama porno infantil ta castigable segun articulo 2:196 di Codigo Penal di Aruba.

Afdeling JZP di Cuerpo Policial di Aruba tin e conocimento y e software necesario pa bringa e tipo di criminalidad aki.

Si Bo persona tin informacion tocante porno infantil, yama tiplijn di Cuerpo Policial di Aruba na 11141.