Premier Evelyn Wever-Croes: E implementacion di eGovernment ta un reto complica y cu lo tuma su tempo pero: LO OFERECE UN SISTEMA MAS TRANSPARENTE Y EFECIENTE PA NOS COMUNIDAD

Premier Evelyn Wever-Croes:

 

E implementacion di eGovernment ta un reto complica y cu lo tuma su tempo pero:

LO OFERECE UN SISTEMA MAS TRANSPARENTE Y EFECIENTE PA NOS COMUNIDAD

 

Na luna di maart, un grupo di 8 studiante riba nivel di Master di Columbia University na New York, a bin Aruba pa analisa Aruba su plan pa eGovernment cu enfoke riba e aspecto humano. Ademas nan a enfoca riba areanan cu lo por beneficia e implementacion di eGovernment pa Aruba pa haci esaki uno mas eficiente cu ta posibel.

 

Durante e siman aki e studiantenan a reuni cu diferente stakeholders den sector priva y publico, pa por a haña un imagen mas miho di Aruba su hendenan, y procesonan gubernamental.

E studiantenan a analisa tambe e proceso di transformacion digital cu otro paisnan ta implementando, entre otro paisnan manera Estonia, Singapore, Malta, Mexico y Dubai. Asina por compronde kico e “best practice” di e paisnan ta y kico Aruba por siña di nan.

 

Durante e ultimo simannan, e team di studiante aki a entrega un plan di accion cu strategianan cu Gobierno di Aruba por implementa pa nos yega mas cerca na un transformacion digital completo, y tambe con Aruba por crece e conocimento di e topico di eGovernment den e comunidad.

 

E rapport aki, ta illustra iniciativanan cu Gobierno di Aruba por implementa, cual nan a parti den 4 pilar cuanan ta: Stimula interes; Crece habilidad; “Quick Wins”; Efectividad duradero.

 

“Quick Wins” lo beneficia Aruba grandemente. Algun ehempelnan di “Quick Wins” ta entre otro:

  • Haci e proceso pa haya un permiso pa negoshi mas eficiente door di ofrece un ‘light-version’ di un permiso cu temporada di valides mas cortico. Un negoshi por cuminsa funciona bou di cierto limitacion pero e negoshi por cuminsa opera mientras e processo pa haya permiso ta andando;
  • Extende e valides di Papel di Cinco Florin. Ofrece un papel di 5 florin cu ta valido pa un termino mas largo. Por ehempel por cobra afl 10 pa un papel cu tin un valides di 6 luna of afl. 20 pa un papel cu valides di 12 luna. Asina aki reduci e tempo cu hende nan mester para den rij pa busca e papel aki;
  • Reduci e tempo para den rij pa busca nummer plaat. Aloca mas empleado publico ora ta temporada di cambia number y asina aki reduci e tempo cu e publico lo mester para den rij.
  • Pagamento di Impuesto. Haci e Sistema di impuesto mas digital posibel pa duna alivio na tur hende. Agilisa esaki pa hende para menos den rij y yena nan formulario online nan mes enbes di bay cerca un accountant of otro caminda.
  • Votacion digital pa e siguiente eleccion. Esaki no ta eVoting. Lo sigui vota den urnanan electoral

Pa tur e pilarnan, e rapport ta ofrece ideanan y strategianan cu lo yuda Gobierno di Aruba, pa asina yega na un transformacion digital. Gobierno di Aruba lo benificia hopi di e estudio aki y e lo yuda pone Aruba riba e mapa di eGovernment mundialmente.

 

Dentro di poco Gobierno di Aruba lo publica e roadmap di eGovernment cu ayudo di e eGovernment Academy di Estonia. E implementacion di eGovernment ta un reto complica y cu lo tuma su tempo, pero si e wordo implementa den e manera corecto, e lo oferece un sistema mas transparente y efeciente pa e empleado publico y pa e servicionan cu Gobierno ta brinda nos comunidad henter.

 

“Pakico eGovernment pa mi ta asinta importante? Pasobra sin eGovernment nos no por logra loke cu nos kier logra riba e caminda di integridad. E proceduranan den gobierno na e momentonan aki ta hopi complica. Y ta dura hopi prome cu wordo atendi y of logra pa haya permiso, placa bek, y of tambe cobransa. Esaki ta laga luga habri pa confusion loke ta duna espacio tambe pa corupcion tuma luga. Esaki ta loke cu Gobierno kier caba cu ne y pone tur cos cana cu transparencia y combati corupcion”, Premier Evelyn Wever-Croes a duna di conoce.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: