Proyekto di lei preventivo kontra di “Grooming”aprobá na Parlatino

Proyekto di lei preventivo kontra di “Grooming”aprobá na Parlatino

 

Durante di e reunion ku tuma lugá for di 12 te ku 14 di yüni último e komishon di Equidat de Genera, Niñez i Hubentut a atende e tema di Grooming.

Grooming ta e akto di traha un laso emoshonal ku un menor di edat pa gana su konfiansa, prinsipalmente via di un chat room di internet, pa yega na un enkuentro, ku intenshon di kometé un delito seksual. Mester rekonosé internèt tin hopi bentaha pero tambe hopi desbentaha pa e menornan di edat.

Kada sekònde un menor di edat ta subi riba internet. Esaki ta hasi e menor di edat vulnerabel na aktonan di Grooming. Inosentemente e por partisipá na un kombersashon, chat, ku un adulto ku ta atra’é e menor di edat aki dor di presentá su mes ku un identidat falsu. Hopi biaha e ta kapta atenshon di e menor di edat dor di hasi komo si fuera e tin interesnan komun. Na momentu ku e logra krea un base di kontakto e ta palabrá un sita kaminda ta kometé e delito seksual.

For di estudionan a bini dilanti ku solamente 35% di adultonan por diserní ku un persona no ta papia bèrdat. Serka mucha e porsentahe aki lo ta muchu mas abou indikando ku nan ta muchu mas vulnerabel pa bira víktima.

Por papia di un revolushon di internèt miéntras leinan a keda atras.

 

Un gran parti di e mayornan no ta konsiente di e embergadura di Grooming.

Tin estudionan ku ta indiká ku di hóbennan entre 9 i 19 aña ku ta bai online por lo ménos 1 biaha pa siman,  por lo ménos 30% a yega di eksperensiá un aserkamentu seksual via retnan sosial di Internèt òf via email.

Di mayornan solamente 7%  ta kere ku nan yu a risibí un aserkamentu seksual via di Internèt.

Loke ta mas preokupante ta ku na momentu ku e problema presentá, mayornan no sa kiko pa hasi òf unda pa bai.

E proyekto di lei kontra di Grooming ta hasi e akto di Grooming kastigabel asta promé ku e delito seksual tuma lugá.

E ta un lei preventivo esta ku e ta pèrmití denunsia promé ku e akto seksual tuma lugá

Dor di e lei lo por redusí e kasonan di abuso seksual di mucha.

 

Frakshon di MP

Marilyn C.Moses

This site uses Akismet to reduce spam. Learn how your comment data is processed.

error: Content is protected !!
%d bloggers like this: