Kunukeronan na Bándabou ta sklama pa yudansa, awor si ta basta!

Kunukeronan na Bándabou ta sklama pa yudansa, awor si ta basta!

Ya pa basta tempu kaba henter Bándabou ta terorisá pa un grupo (konosí pa polis) ku ta kastigá tur e kunukeronan i habitantenan na Bándabou. Denter di 1 siman di tempu a hòrta 8 karné i tur patu di outor (awe).

Kontinuamente tin “free for all” na Bándabou, kaminda e kunukeronan ta manera presu anto e ladronnan ta hasi manera nan ke. Polis ta bisa di no por hasi nada anto ta pidi pa yuda nan. Nan no por hasi nada miéntras no tin prueba. Pero mas tristu ta ku ta hür un pida tereno serka gobièrnu pa kuminsá ku plantashon i krio di bestia kaminda no tin akseso na awa ni koriente. Ora aserka gobièrnu pa yuda kubri e gastunan pa Aqualectra bin konektá e ret di awa i koriente, ta keda ketu ei banda. E ret no ta yega ainda na e tereno, ku Aqualectra lo tin ku bin pone palu di koriente i koba pa pone pipa di awa, anto esakinan ta bini parsialmente pa e kunukero ku tin di biba di ònderstant i e tiki ku su tereno lo duna. miéntras tantu ku bestianan ta muri di sekura, ladron ta fiesta.

Ora bai polis, polis ta pidi prueba ku ta trata di e mesun hendenan ku pa nan ya ta konosí, nan ke bo buta kámara, pero kon ta buta kámara si no tin koriente i konsekuentemente Internèt?

Ta temporada di sekura, no tin awa, tin ku bestèl awa na LVV, sperando ku e awa yega na tempu. Ora ke traha ku pòmp pa saka awa di pos, mester di generator, lokual ku e ladronnan a lastra bai kuné. Meskos ku a bai ku bòm di gas tambe! Ta buta kos pa warda awa aden, teroristanan (no por yama nan otro) ta venená awa!

Segun ku bo ta Sali di dilanti nan ta drenta bo kura parti patras hòrta bo bestianan i plantashon. Ora bo Sali di patras, nan ta kòrta bo waya dilanti pa hòrta bo karnénan. Te hasta bo kos di kareda, ta kibra hòrta bateria i radio bai kuné, pasobra e no por a kore nan no a logra bai kuné.

Un hende su kana ta yena, ta keda buska manera pa atendé ku kos manera mester ta segun lei, pero no por wanta mas asina. Ta yega un momento, despues di tantu aña ta lucha ta bringa di dia i anochi i hasta mardugá pasobra a bin yobe bo kas ku piedra, ku ta tuma lei den bo mes man. Un hende no por sigui soportá tantu anto no ta risibí e yudansa nesesario. Ta asina ke stimulá kunuku na Kòrsou? Ta asina Kòrsou a bira?

Por tuma kontakto libramente òf pasa pa haña un rekorido serka e diferente kunukeronan ku ta pasando kastigu tur santu dia pa sobreviví.

Un kunukero di Kòrsou:

Errol Hoyer

Sta. Martha Chikí 4

Bándabou