Minister Jesus-Leito na nòmber di Kòrsou a firma tratado di aviashon ku Portugal.

Minister Jesus-Leito na nòmber di Kòrsou a firma tratado di aviashon ku Portugal.

Willemstad – Minister di Tráfiko, Transporte i Planifikashon Urbano, sra. Zita Jesus-Leito, resientemente a biaha pa Portugal pa asina firma un tratado di aviashon – “Air Service Agreement” (ASA) – ku sekretario di Estado di Komunikashon di Portugal,  sr. Alberto Souto de Miranda. Minister Jesus-Leito a firma e tratado ku Portugal na nòmber di Reino Hulandes na benefisio di Kòrsou. Firmamentu di tratadonan di aviashon ta un instrumento krusial den e oumento di “air lift” pa Kòrsou.

Firmamentu di e tratado aki entre Portugal  i Kòrsou ta nifiká ku kualke un aerolínea di Kòrsou por operá for di Kòrsou direkshon pa Portugal hasiendo uzo di kualke un aeropuerto komersial di e pais. Meskos ta konta tambe pa aerolíneanan portugues ku ta bula direkshon di Kòrsou.

Den e último añanan Kòrsou a negoshá diferente akuerdo di aviashon ku diferente pais, e.o. Republika Dominikana, i lo sigui amplia i evaluá  e  akuerdonan di aviashon pa asina kede traha riba “open skies” policy ku gobièrnu ta para p’e.