REINO HULANDES TA UN FEDERASHON

REINO HULANDES TA UN FEDERASHON

Komprondé bon. Nos no ta bisa ku Reino Hulandes mester bira un federashon. E ta un federashon kaba. For di 1954 Reino Hulandes tabata un federashon. Sin embargo, pa un motibu deskonosí, ni Hulanda ni Antia nunka no kier a akseptá e realidat aki.

 

Despues di 10-10-10 e federashon ta konsistí di kuater estadonan federal, esta Hulanda, Kòrsou, Aruba y St. Maarten. Pa nos islanan esaki ta hopi importante, pasobra art. 50 di e Tratado di Derechonan Sivil y Polítiko y tambe art. 28 di e Tratado di Derechonan Soshal, Ekonómiko y Kultural ta bisa lo siguiente:

“The provisions of the present Covenant shall extend to all parts of federal States without any limitations or exceptions”.     

 

Na Papiamentu:

“E disposishonnan di e Tratado aki ta ekstendé na tur parti di federashonnan sin niun límite òf eksepshon”. 

 

E Tratadonan aki ta na vigor tantu na Hulanda komo na nos islanan. Ku otro palabra, asina ku nos realisá ku e aktual struktura ankrá den Statüt ta konstituí un federashon, nos tin un base legal pa aserká Union Europeo pa negoshá un relashon speshal ku UE, manera a ser hasí pa e Islanan di Åland (parti di Finlandia), miéntras ku e derechonan soshal y ekonómiko entre Hulanda y e islanan di Kòrsou, Aruba y SXM mester wòrdu igualisá.

 

Tanten ku nos keda koutivá den nos propio estado mental ilusorio ku e islanan di Kòrsou, Aruba y St. Maarten ta ‘paisnan’ outónomo (y nò estadonan federal), nos mes tin ku karga e peso finansiero pa mantené derechonan soshal y ekonómiko na nivel. Y pokopoko nos ta kuminsá ripará ku esei lo no ta posibel.

 

Pero tin solushon pues. Nos mester habri nos wowo.

 

Un splikashon detayá di e tésis aki, e lesadó interesá por haña den un ‘free e-book’ na www.arcocarib.com, titulá: ‘De Zon verlicht de Weg’.

 

Bonaire, 4 di yüli 2019

Pa fundashon Golden Meand Society (GMS)

Michiel Bijkerk