Oumento drástiko di desempleo i problemanan ku ta keda manifestá nan mes den e ministerio di SOAW

Willemstad, 9 di yüli 2019

 

Na Presidente di Parlamento

Señor W. Millerson

P/a Wilhelminaplein # 4

PRESENTE

 

Tópiko: Oumento drástiko di desempleo i problemanan ku ta keda manifestá nan mes den e ministerio di SOAW, kual ta e ministerio ku mester atendé ku problemanan relashoná ku desempleo na Kòrsou

 

Señor Presidente,

 

Frakshon di Movementu Futuro Kòrsou (MFK) ke hasi uso di su derecho konforme artíkulo 64 insiso 4 di nos Reglamentu di Ordu (RvO) i ta aserka bo persona di pa yama un reunion públiko ku e punto di agènda ariba menshoná. 

 

Frakshon di MFK a tuma nota ku sifranan ku “Central Bureau voor Statistiek” (CBS) a publiká resientemente ta indiká ku desempleo na Kòrsou a a subi  i yega te na 21.2%. E sifra di desempleo aki ta algu hopi serio, si tuma na kuenta ku na sèptèmber di 2018 e porsentahe tataba13.4%.

 

Den media nos a tuma nota ku SOAW, ku ta e ministerio ku lo mester atendé ku e parti di desempleadonan, un biaha mas ta den notisia relashoná ku e edifisio kaminda empleadonan públiko di e ministerio aki tin ku laborá. Den medionan lokal nos por a tuma nota tambe di e intenshon di e Minister enkargá ku SOAW, pa bai hinka hinter e asuntu pa atendé ku desempleadonan den un fundashon i esaki pa un suma eksorbitante.

 

Konstantemente nos por tende Ministernan di gabinete Rhuggenaath ta papia ku nan mester keda di focus pa den e tempunan difísil aki saka Kòrsou for di e problemanan ku nos dushi Kòrsou ta pasando aden.

 

Pero e realidat ta otro, debí ku anunsionan manera e enkuesta di CBS ta mustra ku gabinete Rhuggenaath ta hibando Kòrsou, di Guatemala pa Guatepeor i nos frakshon no por sinta man krusa i laga gabinete Rhuggenaath hiba Kòrsou na un abismo.

 

Frakshon di MFK pa medio di esaki ta pidi Presidente di Parlamento invitá Minister presidente señor Eugene Rhuggenaath i Minister enkargá ku SOAW señor Hensley Koeiman pa ta presente durante di e reunion aki, pa asina Parlamento por debatí riba e tópikonan aki i fiha un posishon ku ta benefisiá pueblo di Kòrsou i e grupo di desempleadonan.

 

Atentamente,

 

_______________ _______________ ______________

Jacinta Constancia Charles Cooper Juniël Carolina