Oumento drástiko di desempleo miéntras ku SOAW no ta demonstrá di ta proaktivo
Oumento drástiko di desempleo miéntras ku SOAW no ta demonstrá di ta proaktivo
Tin hopi preokupashon i insertidumbre riba funshonamentu di e ministerio di Desaroyo Sosial, Labor i Bienestar. Netamente den un periodo ku nos komunidat mas tin mester di e servisionan di e ministerio aki.
Resientemente CBS a publiká ku nan a registrá un oumento di desempleo di 14.1 porshento pa 21.2 porshento den seis luna. Esaki ta un subida signifikante kompará ku e porsentahe di 13.4 na sèptèmber 2018.
Por konkluí ku den 6 lunanan di tempu, di yanüari 2019 te ku yüni 2019, mas ku 6000 suidadano a pèrdè nan trabou. Pues un promedio di 1000 hende pa luna ku a bai kas ku tur su konsekuenshanan.
Por tuma nota den komunidat ku tin algun aktividatnan ekonómiko manera Blue Bay Resort pero tambe algun pendiente pa habri nan portanan pero no ta mira e partisipashon proaktivo di e ministerio di SOAW ku mester ta en buska di trabou pa nos yu di Kòrsou.
Konsiderando e ariba menshoná e frakshon di Movementu Progresivo ta hasi Minister di Desaroyo Sosial, Labor i Bienestar e siguiente preguntanan :
- Kua ta e akshonnan ku e Minister a tuma i ehekutá den e periodo di yanüari 2019 I yüli 2019 pa frena e oumento di desempleo?
- Kua i kiko ta e akshonnan di maneho ku Minister a implementá pa oumento di empleo na Kòrsou?
- Kua ta e pasonan ku minister a tuma pa fasilitá un bon klima di invershon?
- Minister por informá parlamento na unda a apliká e filosofia “ kada yu di Kòrsou na trabou promé” segun e akuerdo di gobernashon página 21, 3.5 titulo Trabou pa yu di Kòrsou?
- Kuantu yu di Kòrsou a haña empleo bou di e filosofia aki entre yanüari 2019 te ku yüni 2019?
- Minister tabata na altura ku ta alrededor di 1000 trahadó pa luna tabata pèrdè trabou den e periodo di yanüari 2019 te ku yüni 2019?
- Minister por konfirmá e sifra di desempleo di 21.2 porshento den e último seis lunanan di CBS?
- Minister por indiká, a base di maneho, kuantu yu di Kòrsou lo haña trabou den e próksimo periodo di yüli 2019 te ku desèmber 2019?
- Minister tin un bista kaba riba e aktividatnan ekonómiko ku lo krea kuponan di trabou den e periodo di yüli 2019 i desèmber 2019?
- Minister por splika kon e ministerio di SOAW ta ehekutando kòntròl riba aplikashon di e lei di suèldo mínimo pa prevení mal uzo?
- Minister indiká ki dia lo tin trankilidat bou di e empleadonan di SOAW ku ta lucha pa un mihó lokalidat pa asina nan por ehersé nan trabou mihó?
E último dianan tin akshon atrobe i intrankilidat bou di e empleadonan ku mester duna pueblo e servisio pa ku empleo.
- Minister por konfirmá ku den kuadro di e rapòrt di “Groeistrategie Curaçao ‘ ya kaba tin un lei den preparashon pa suavisá e lei di retiro aktual?
- Minister por konfirmá ku den kuadro di e rapòrt di “Groeistrategie Curaçao ‘ tin planiá kaba pa retirá un kantidat di 640 empleado públiko?
- Si esaki no ta kuadra, kuantu empleado públiko Gabinete Rhuggenaath tin planiá pa retirá?
Marilyn C.Moses
Movementu Progresivo
