Prome Minister Evelyn Wever-Croes: Prome Minister a reuni United Farmers Aruba: AGRICULTURA POR TA UN PILAR ECONOMICO PA ARUBA

Prome Minister Evelyn Wever-Croes:

Prome Minister a reuni United Farmers Aruba:

AGRICULTURA POR TA UN PILAR ECONOMICO PA ARUBA

 

Prome Minister Mrs Evelyn Wever-Croes a reuni cu United Farmers Aruba cu ta representa e cunukeronan di Aruba. Manera ta conoci agricultura ta un pilar economico cu Gabinete Wever-Croes kier desaroya y pa e motibo aki a considera importante reuni cu esnan mas envolvi den e area aki pa scucha nan preocupacion y retonan. 

 

E obhetivo di gobierno ta pa por stimula e cunukeronan pa sigui cosecha y mirando cu prijs di awa ta e reto di mas grandi nan ta trahando riba un proposicion pa wak con por minimalisa esaki. United Farmers Aruba mes a entrega un proposicion na WEB di cual WEB conhuntamente cu Gobierno ta repasando pa asina yega na un posibel solucion. 

 

Un otro punto di preocupacion ta e tema di impuesto y aki ta unda cu Prome Minister a sa di duna claridad y tranparencia na e cunukeronan pa cu e excepcion di impuesto cu nan tin riba produccion y bentanan como estimulo pa nan sigui cu nan trabounan. 

 

Premier Wever-Croes tambe a menciona cu Gobierno kier designa un parti di Aruba pa e terenonan di agricultura cual tawata pendiente riba e ROP. Diabierna ultimo e ROP finalmente a keda cla y awo e cunukeronan por haya e terenonan cu a wordo indica pa Minister di Infrastructura cu ta apto pa agricultura.  

 

Otro punto cu Prome Minister a discuti cu United Farmers Aruba ta cu Gobierno ta trahando riba un posibilidad pa e cunukeronan por haya un incentiva den financiamento. E interes pa bay den e area di agricultura ta hopi grandi especialmente entre nos hobennan y hopi ta esnan cu kier bay den agricultura innovativo na unda cu e costo di ekiponan pa por ehecuta e trabou ta bira hopi mas halto. Pa e motibo aki Gobierno ta trahando riba un plan di incentivo pa e cunukeronan aki por haya financiamento na un interes reduci. Un di e ideanan cu a ser lansa anteriormente ta pa bin cu un Banco di Desaroyo cu den realidad no solamente lo yuda e comerciantenan chikito cu finaciamento na interes abou pero lo “adopta” nan y yuda nan cu tur estudio cu nan mester pa set up tur loke ta trata temanan legal laboral y impuesto y pa guia nan con pa maneha e compania mas eficiente te ora cu nan bira independiente.

 

“Gobierno ta haciendo su maximo esfuerso pa por cumpli cu tur e puntonan aki cu a ser delibera cu United Farmers Aruba pa motibo cu e Gobierno aki ta kere cu agricultura ta hopi importante no solamente como pilar economico pero tambe pa Aruba no ta asina dependiente riba importacion di fruta y berdura manera ta e caso actualmente”, Prome Minister Evelyn Wever-Croes a duna di conoce. 

This site uses Akismet to reduce spam. Learn how your comment data is processed.

%d bloggers like this: