Prome Minister Evelyn Wever-Croes: NINGUN BIAHE PRIVA TA WORDO CUBRI PA GOBIERNO Gabinete Wever-Croes a baha gasto di ministernan cu 20 miyon florin
Prome Minister Evelyn Wever-Croes:
NINGUN BIAHE PRIVA TA WORDO CUBRI PA GOBIERNO
Gabinete Wever-Croes a baha gasto di ministernan cu 20 miyon florin
Durante un entrevista na radio Top FM sr. Hans Geerman a haci Premier Evelyn Wever-Croes pregunta riba e lista di biahenan di Ministernan cu ta circulando. E lista aki ta duna no solamente un cantidad ireal di biahenan haci pa cada minister pero tambe suma mucho mas ireal ainda siendo cu cada minister tin un presupuesto pa aña pa haci biahenan di trabou. Contestando e pregunta aki, Premier Wever-Croes tabata hopi al caso y transparente riba esaki. Premier Wever-Croes a duna un splicacion amplio riba e procedura di biahenan di Ministernan y a indica tambe e fuente for di unda e informacion robes tocante e biahenan a bin, cu ta for di opositornan politico den Parlamento.
E lista cu ta circulando rond tocante e biahenan di ministernan ta un bruhamento di tera atrobe cu fin politico. E lista ta bruha biahenan priva y biahenan di trabou den otro, siendo cu ningun biahe priva di e ministernan di Gabinete Wever-Croes ta wordo cubri pa Gobierno.
“Mi no sa si den temporada di gobierno di AVP esey tabata pasa, pero den mi Gobierno esey no ta e caso. Pues e ministernan ta paga nan biahenan priva, nan mes. Tur minister tin derecho riba vakantie y tin minister cu ta haci biahe relaciona cu nan salud”, Premier Wever-Croes a enfatisa.
Premier Wever-Croes a enfatisa tambe cu tin un procedura pa cu e biahenan di ministernan. Segun regla cada biaha cu un minister no ta na Aruba, mester pone Gobernador di Aruba y Parlamento di Aruba tambe na haltura, esaki ta conta tambe pa biahenan priva. Riba e lista cu Parlamento ta ricibi, ta indica claramente e biahenan di trabou y biahenan Priva. Y cada Parlamentario por wak esaki. Pero esaki no kiermeen cu Gobierno ta paga ambos biahe. Gobierno ta paga solamente biahenan di trabou. Ta di lamenta cu Parlamentarionan di oposicion ta purba bruha tera un biaha mas y informa pueblo un biaha mas cu mentira, mientras cu nan ta na haltura di e procedura aki. Esaki segun Premier Wever-Croes ta un forma hopi inmadura pa anda cu informacion cu Parlamento ta ricibi riba asuntonan serio cu fin politico.
“Awor cu ta obvio cu oponentenan den Parlamento no por anda na forma madura cu informacion cu Parlamento ta haya, nos mester reevalua e procedura aki. Tambe cada biahe di trabou, e minister ta bay Ministerraad pa haya aprobacion y ta splica e motibo di e biahe. Cada minister tin un presupuesto di biahe cu e mester atene su mes na dje. Pues no ta asina cu ‘the sky is the limit’. Esaki por tawata asina den e gobernacion anterior. Pero Gabinete Wever-Croes ta un Gobierno serio y ta atene su mes na regla y proceduranan di biahenan di trabou pa nos ministernan”, Premier Wever-Croes a duna di conoce.
Gabinete Wever-Croes ta consisti di 8 minister, un menos cu gobierno anterior, y e 8 ministernan aki ta costa 20 miyon florin MENOS cu e 9 ministernan di gobierno anterior. Nos ta tuma finansas publico hopi na serio y ta haci e gastonan solamente necesario.
Mi ta haci un apelacion na henter comunidad pa no cay pa e mentiranan di nos oponentenan. E desastre financiero cu nan a causa ta enormemente grandi y ta tumando hopi tempo y energia pa nos sali di e crisis aki. Pero mi ta convenci cu den union nos lo logra.
