PIN no ta sukumbí pa polítika di kabalachi

PIN no ta sukumbí pa polítika di kabalachi

 

For di momentu ku sra. Suzy Camelia-Römer di PIN a aseptá e kargo di Minister di Salú, Medio Ambiente i Naturalesa dia 29 mei 2017, tabata konosí pa PIN ku ta trata di e kartera ku kisas mas reto den ambito di gobernashon. Na e momentu ei ya tabata konosí ku e hospital nobo tabata leu for di keda kla despues di tres aña di konstrukshon, tabatin hopi interogatorio riba e suma ku e hospital lo bai kosta i hopi otro punto vulnerabel pa ku maneho di kuido médiko, manera gastunan astonómiko di remedi, ingresonan di speshalistanan, lista di espera i kalidat di kuido hospitalario. E minister ta hasiendo netamente lokual Kòrsou a spera di dje: Kue e bakanan na nan kachu, tuma desishon i atendé ku e resitensha i konsekuenshanan di desishonnan ku keda tumá, pa Kòrsou por tin un hosptal nobo di kalidat mas lihé posibel.  

 

Algun dia pasá a kuminsá kuestioná e kuenta ku a keda presentá for di momentu ku a disidí di traha e hospital nobo na Otrabanda. Ora ku a prohibí pa lubidá, a sigui un tras di otro ku fabrikashon di mentira i manipulashon di realidat. Opositornan ku despues di 2010 a hasi dañonan konsiderabel na nos institutonan, manera Korte, Ministerio Públiko, relashonnan den Reino, Kontrolaria General, den nan afan pa hasi politikeria di kabalachi (esta hisa benta tur sorto di mentira wak kua ta pega), awor ta violando privasidat di Yunan di Kòrsou dor di publiká informashon privá di hende i ta intentá na krea un persepshon di konflikto ku Gobernador i violashon di lei.

Pa lokual ta trata e dekreto di apoderashon ku Gobernador, hasiendo uzo di e base legal na su disposishon, a pone na huisio di Rei, opositornan polítiko awor kier laga parse ku ta trata di trata di un violashon di lei. Hecho ta ku PIN a tuma nota di varios dekreto di apoderashon ku a ser firmá despues ku gobiernunan a tuma desishonnan ku impakto presupuetario grandi. Esei p.e. tabata e kaso na momentu ku minister Whiteman (PS) a firma un MOU ku Guandong Zhenrong Limited i tambe e dekreto ku a drenta ku forsa retro-aktivo di kasi un aña despues ku minister Dick (PS) a firma un akuerdo ku sindikatonan den sektor di enseñansa ku konsekuensha finansiero grandi. Pues e ultimo munishon di e politikeria di kabalachi tampoko lo tin un bida largu.

Meta di opositornan pa yega na poder a kosto di tur kos ya ta bon konosí, for di momentu ku na 2017 a hasi intento pa kita e derechi elektoral di komunidat. Pa PIN ta remarkabel kon netamente esnan di PS ku nan lider a ser likidá na un manera kruel (apenas 6 aña ku 3 luna pasá), awe ta pará huntu ku esnan ku ta sospechoso den e kaso di asesinato di nan lider den nan politikeria di kabalachi. 

E ultimo simannan aki, hopi ta esnan ku a aserká PIN i mustra sosten pa yega na un hospital nobo prome ku fin di aña i no laga forsanan destruktivo kita e servisio hospitalario di kalidat for di komunidat. PIN ta konvensí ku tur bèrdat di e konstrukshon di un hospital nobo lo mira lus di dia na momentu ku Kontrolaria General i e Enkuesta Parlamentario yega na su fin. Mientras tantu, PIN ta pará 100 100 tras di su minister i su koleganan di kabinete Rhuggenaath, ku ta para manera un moketa den e tempu difisil ku pais ta pasando.