Keho di detenidonan relashon ku e forma ku gerensia di prisòn ta permití un supermerkado pa entrega produktonan

Na Minister di Hustisia

Señor Quincy Girigorie

PRESENTE

 

Willemstad, 29 di yüli 2019

Tópiko:  Keho di detenidonan relashon ku e forma ku gerensia di prisòn ta permití un supermerkado pa entrega produktonan di kalidat inferior pa prezunan konsumí

 

Honorabel Minister Girigorie,                                                                                                                 

 

Frakshon di MFK a tuma nota di e protesta di detenidonan relashoná ku produktonan ku prezunan por kumpra via di kantine. Segun nos a komprondé ku SDKK tin akuerdo ku un supermerkado so, pa hasi entrega di produktonan ku detenidonan por kumpra ku nan sèn propio, via di e asina yama kantine.

 

Detenidonan siman pasa a debolbé e lista ku nan a risibí kaminda tin e produktonan ku nan por kumpra, esaki debí ku riba e lista tabata falta masha hopi artíkulo ku nan por a dispone di dje den pasado.

 

Pero tambe detenidonan a konstatá ku e supermerkado ta trata na sali for di produktonan ku nan no ta bende òf ku no ta bendiendo bon i ta pone esakinan riba e lista pa e detenidonan kumpra. E lista di kantine ta karga ku produktonan ku ta dispone di hopi suku i ku ta halsa energia di e detenidonan.

 

Relashoná ku e puntonan ariba menshon suskrito, hasiendo uso di artíkulo 96 di Reglamentu di Orden di Parlamento ta hasi Minister Girigorie e siguiente preguntanan;

 

1. Minister ta na altura ku ta reina un malkontentu bou di detenidonan den SDKK relashoná ku produktonan ku ta wòrdu pone na nan pa medio di kantine?

 

1. Minister por informá Parlamento ku si gerensia di SDKK ta skohe e supermerkado ku ta hasi entrega di produktonan pa kantine pa medio di un destaho públiko?

 

1. Si kontesta na pregunta # 2 ta negativo, a base di kua kriterionan ta skohe e supermerkado ku por hasi entrega di produktonan?

2. Minister por informá Parlamento kon e proseso den SDKK ta pa kontrolá e kalidat di e produktonan ku ta wòrdu entrega i ku no ta dumpmentu di produkto ta tuma lugá dor di e supermerkado?

 

1. E supermerkado ta entrega su produktonan pa medio di krédito òf e pago ta tuma lugá al instante ora ku e produktonan wòrdu entrega ?

 

Frakshon di MFK ta spera ku Minister Girigorie  tuma bon nota di e preokupashon di e detenidonan di SDKK i ku minister kontestá e preguntanan den e tempu stipulá pa nos Reglamento di Orden i tambe e protokòl firma entre gobièrnu i Parlamento di Kòrsou.

 

Atentamente,

 

___________________

Juniël Carolina

Miembro di Parlamento

Frakshon di MFK

 

Na: Presidente di Parlamento di Kòrsou

Señor W. Millerson

Wilhelminaplein # 4

PRESENTE

 

Kòrsou, 29 di yüli 2019

 

Apresiabel Señor Millerson, 

 

Pa medio di e karta aki, hasiendo uso di artíkulo 96 di reglamentu di órden 

di Parlamento, mi ke pidi bo persona pa dirigí e karta athunto na Minister Quincy Girigorie enkargá ku Hustisia, ku preguntanan ku mi persona ta hasi na e minister konserní.

 

Danki pa e koperashon.

 

Atentamente,

 

___________________                 

Juniël Carolina

Miembro di Parlamento

Frakshon di MFK