Rev. Pastor Raul Mercedes ku un empleado a test positivo pa COVID-19

Un saserdote di Obispado di Willemstad a test positivo pa e vírus Covid-19
Pa medio di e komunikado akí Obispado di Willemstad ta partisipá den un forma ofisial ku un saserdote a tèst positivo pa e vírus Covid-19.
Rev. Pastor Raul Mercedes, despues ku un empleado a test positivo mesora a drenta den karentena i a kanselá su selebrashonnan di misa. Tambe el a tuma kontakto ku e dòkter di kas ku a lag’é hasi un tèst di kual e resultado ya ta konosí. Pastor Raul a informá Obispado di Willemstad kende mesora a laga drenta den kontakto ku e tim di Epidemiologia tokante e situashon i konhunto a tuma medidanan nesesario kual a inkluí desinfektashon di misa. Rev. Raul Mercedes na e momentonan akí no tin niun síntoma i ta mantené su mes den isolashon estrikto.
Pa tur fiel ku ta òf ta bishitá misa di La Bírgen di Altagracia Steenrijk, no mester tin niun motibu di pániko mirando ku Pastor Raul semper a mantené un distansia di mas ku dos meter na momento di selebrashon di misa i a sigui e medidanan dekretá opa Obispado di Willemstad. Mirando ku su misa ta disponé di èrko tur fiel ku ta asistí tabata usa tapa boka obligatorio.
Pa loke ta trata selebrashonnan di misa di Ourora, ta sigui normal na e orario di 5 or di mainta. Tambe lo anunsiá e otro orario di selebrashonnan den tempu di Pasku ku posibel adaptashon. Obispado ta surgi tur fiel i henter komunidat pa sigui mantené e medidanan nesesario pa asina huntu nos sigui kontené e transmishon di Civd-19.
Laga nos keda den orashon pa pronto rekuperashon di tur enfermo i kòrda riba esnan ku ta kuida e enfermonan.
Pa mas informashon por tuma kontakto ku Rev. Curtis Meris na telefon 5259323

This site uses Akismet to reduce spam. Learn how your comment data is processed.

error: Content is protected !!
%d bloggers like this: