SCHERPENHEUVEL I VESTA LO TOPA DURANTE E GRAN FINAL LIGA MCB PROMÉ DIVISHON DJADUMINGU 11 DI OUGÙSTÙS 2019, 6’OR DI ATARDI DEN SDK!

SCHERPENHEUVEL I VESTA LO TOPA DURANTE E GRAN FINAL LIGA MCB PROMÉ DIVISHON DJADUMINGU 11 DI OUGÙSTÙS 2019, 6’OR DI ATARDI DEN SDK!

 Tur kos ta kla pa djadumingu awor, 11 di ougùstùs, 6’or di atardi Scherpenheuvel topa kara kara ku Vesta durante e Gran Final di Liga MCB Promé Divishon 2018-2019! Despues di un tremendo temporada e 2 ekiponan aki a logra klasifiká pa e final di Liga MCB Promé Divishon. Preparashonnan ta tumando lugá paso ámbos ekipo lo bin tur ku tin i bon prepará pa bai kas ku e kopa di kampion! Pues un i tur por ta sigur ku nan lo disfrutá di bon futbòl i dushi ambiente durante e atardi/anochi aki. Animashon musikal ta na enkargo di DJ Bradley i e grupo di baile D’Art lo sòru pa un ‘half-time show’ tur afó!

E aña aki Liga MCB a keda dediká na e siguiente baluartenan; Sr. Donald Gosepa (èks hungadó), defuntu Sr. Lesly Melfor (èks hungadó), Sr. Hector Weert (èks rèfri), Sr. Rolando Goeloe (èks dirigente administrativo) i Sr. Eulogio Leocadia (èks masahista). E pèrsonanan aki ta tin un kontribushon enorme na e desaroyo di e deporte rei, futbòl. P’esei nan a keda homenagiá i FFK a dediká e kampionato di e aña aki na nan.

Tabla di goliadó:

Nòmber Ekipo Gol
Nicolas Rocha Gomez Scherpenheuvel 15
Mirco Colina Jr Vesta 14
Jimbertson Vapor Scherpenheuvel 14
Jurensley Martina CSD Barber 12
Ruchendro Kierindongo Vesta 10
Christopher Isenia Scherpenheuvel 9

 

 

Tabla di posishon Liga MCB Buèlta di 4:

 

WH WG WE WP Pt GF GK Saldo
1 SCHERPENHEUVEL 3 2 1 0 7 8 2 6
2 SV VESTA 3 1 2 0 5 4 2 2
3 C.S.D. BARBER 3 1 1 1 4 5 5 0
4 JONG HOLLAND 3 0 0 3 0 2 10 -8
   
  6 4 4 4 16 19 19 0

 

 

Karchinan adelantá ta optenibel djabièrnè na FFK bou di ora di ofisina, djasabra na lokètnan di SDK di 9’or di mainta pa 4’or di atardi, Feng Wei B.V. enfrente di Stadion di Vesta i serka dirigentenan di ámbos ekipo. Karchinan adelantá ta kosta fl.10,- pa adulto miéntras mucha di 6 te ku 12 aña i 60+ ta paga solamente fl.6,-.

Djadumingu karchinan ta optenibel na e lokètnan di SDK for di 9’or di mainta i e preis pa esaki nan ta fl.12.50 pa adulto miéntras mucha di 6 te ku 12 aña i 60+ ta keda fl.6,-.

Portanan ta habri for di 4’or di atardi, kòrda yega trempan pa evitá e tráfiko!

 

Ken lo bai titulá su mes kampion e biaha aki??? Un yamada ta bai na hinter e pueblo di Kòrsou pa asistí na e último partido di Liga MCB Promé Divishon pa e temporada aki. Tur fanátiko di Scherpenheuvel, fanatikonan di Vesta i fanátikonan di futbòl en general, basha bin stadion i bin mira kua ekipo lo titulá kampion di Liga MCB Promé Divishon 2018-2019! Bin pasa un ratu ameno den kompania di bo famia i disfrutá di bo deporte preferí e deporte rei, futbòl!

MCB i FFK ta warda bo!

 

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: