Aspirantenan pa polis ta kuminsá ku nan estudio.

KOMUNIKADO DI PRENSA 329 / 2019
20 ougùstùs 2019
Aspirantenan pa polis ta kuminsá ku nan estudio.
Departamentu di Komunikashon i Prevenshon
KUERPO POLISIAL KÒRSOU SIRBI I PROTEHÁ

Despues ku a habri oportunidat pa buska aspirantenan di polis pa medio di solisitut den aña
2018, porfin ta asina leu ku e kandidatonan ku a keda selektá, ta bai kuminsá
próksimamente ku nan estudio básiko pa polis.
Di e alrededor 713 persona ku a apliká riba e vakatura aki, un kantidat di 409 a kumpli ku e
eksigensianan básiko, pa por a pasa e diferente tèstnan, ku tabata forma parti di e
selekshon.
Na e prueba di idioma Hulandes ku ta na nivel di B1, 219 persona a logra yega, di kua
únikamente 73 kandidato a pasa esaki ku bon resultado.
Finalmente un kantidat di 26 kandidato a yega final di e selekshon ku éksito.
Ta bon pa asentuá, ku personanan ku ke skohe pa e trabou di polis, mester prepará nan
mes hopi bon, sigur pa loke ta trata e idioma Hulandes, pasobra lamentablemente na e
prueba aki, un parti konsiderabel di e kandidatonan ta kai afó.
E 26 kandidatonan ku ta bai kuminsá ku e estudio di polis, tabatin dos dia di introdukshon
na Kuerpo Polisial Kòrsou, unda nan a sera konosí ku Minister di Hustisia i Tim di Maneho di
e kuerpo i a haña diferente presentashon di instansianan manera S.V.B., A.P.C. i A.R.B.O.
Tambe nan a risibí splikashon tokante struktura di e organisashon, informashon relashoná
ku posishon hurídiko, e trayekto di estudio, komunikashon i tambe integridat.
Seguidamente e grupo, ku a keda partí den dos, a keda entrega na Opleidingsinstituut voor
de Rechtshandhaving & Veiligheid (O.R.V.), kaminda durante aproksimadamente algu mas
ku dos aña, nan lo bai haña nan formashon polisial ku lo ta un kombinashon teorétiko i
práktiko.

Riba e kombinashon di foto, e aspirantenan di polis ku próksimamente ta bai kuminsá nan
estudio na O.R.V., den kompanía di miembronan di Tim di Maneho di Polis i Hefe di e unidat
di Rekurso Humano.

This site uses Akismet to reduce spam. Learn how your comment data is processed.

error: Content is protected !!
%d bloggers like this: