E Rif nobo ta limpi, salú i vibrante

E Rif nobo ta limpi, salú i vibrante

 

Willemstad – Ehekushon di Programa di Desaroyo di Rif, kual ta konsistí di un kantidat di 8 proyekto tantu públiko komo privá, a kuminsá ofisialmente. Preparashonnan ménos bisto a kuminsá for di komienso di e aña aki, i resientemente públiko por a nota komienso di e trabounan bisto tambe. Meta di Programa Rif ta pa hasi di Rif un área vibrante pa habitantenan di Kòrsou i turista. E programa ta konsistí di 3 fase. Den e fase aktual – esta fase 1 – lo inisiá i finalisá 5 proyekto públiko grandi den e área aki, i tambe 3 proyekto di inisiativa privá.

 

Komo parti di e Strategia di Kresementu pa Kòrsou (“Groeistrategie Curaçao”), Ministerio di Tráfiko, Transporte i Planifikashon Urbano a duna prioridat na Programa Rif. E proyektonan ku ta forma parti di e programa aki ta: un infrastruktura – adaptá na e nesesidat di futuro – pa maneho i transporte di awa di riolering, un kaya nobo pa konektá sentro di Otrobanda ku e terminalnan di krusero pa medio di ekstenshon di Hamelbergweg, Parke di Palu di Mangel 1, un kanal di konekshon entre Parke di Palu di Mangel 1 i 2 i un kaya nobo pa mehorá fluktuashon fásil i lihé di tráfiko ku ta bini di e terminalnan di krusero, via stadion di Rif. Gobièrnu mes lo finansiá e proyektonan aki, pa un montante total di entre 20 pa 25 mion florin. E proyektonan di inisiativa privá ta Hotèl Corendon i Hotèl Courtyard Marriott, i renobashon di Hotel Renaissance Curaçao Resort & Casino.

 

Desaroyo di e área di Rif tin su base den un kantidat di dokumento stratégiko durante añanan. Entre e dokumentonan aki ta figurá Plan Mayó (2007), Masterplan Rif di Konseho Insular, vishon stratégiko Zakitó, mas resien den Programa di Gobernashon 2017-2021 i por último Strategia di Kresementu pa Kòrsou. Pues, for di un punto di bista di maneho no tin duda ku e área di Rif meresé atenshon i ta hañando esaki. Sinembargo, ta importante pa desaroyá Rif ku urgensia. No solamente for di punto di bista di maneho, pero tambe teniendo na kuenta aspektonan di salubridat públiko i di infrastruktura.

 

T’asina ku e área di palunan di mangel na Rif ta kontaminá i na sierto partinan asta gravemente infektá ku supstansianan dañino pa salú. Esaki, debí na e desagwe di awa di riolering den e “binnenwater” di Rif, kombiná ku e echo ku e awa den e área aki no ta sirkulá. E falta di sirkulashon di awa a krea ademas un área grandi di lugá di brui di sangura. Konsiderando ku den un lapso di algun luna pa dos aña Curaçao Medical Center, Hotèl Corendon i Hotèl Courtyard Marriott lo habri nan portanan, e situashon di desagwe den e “binnenwater” di Rif lo empeorá, si no tuma akshon ku e debido urgensia.

 

Konseho

Gobièrnu ta konsiente di e preokupashon ku ta reina den sierto gremionan di nos komunidat tokante e palunan di mangel i e kaminda di konekshon entre Rif i sentro di Otrobanda. Ta pa e motibu aki mes gobièrnu a tuma e kantidat di konseho ku tabata nesesario, i a basa su desishon tumá for di aña 2008 i ratifiká na 2018, riba konsiderashonnan di tur grupo di interes, entre nan Sosiedat di Komersiantenan di Otrobanda (SKO) i Amigunan di Tera. Tabatin diferente alternativa pa konektá Otrobanda i Rif. Ku e opshon ku a opta p’e, lo ‘verdun’ algun palu di mangel. E área kaminda lo kita algun palu di mangel ta netamente un área kaminda e suela ta sumamente infektá, loke ta forma un menasa pa salubridat públiko. Lo krea un parke di palu di mangel ku un ruta pa peaton, un ruta pa bai den kanoa i posibilidat pa rekreá. Ademas lo tin un sentro di informashon pa bishitante, kaminda muchanan di skol tambe lo por haña tur informashon pa traha nan proyektonan eskolar.

 

Un di e kondishonnan mas importante pa por krea e parke aki tabata un solushon pa e problema di desagwe di awa di riolering den e “binnenwater” di Rif, kaminda e palunan di mangel ta. Lo atendé e problema aki dor di instalá un pòmp nobo ku generator, i komputarisá, pa e sistema ku ta atendé maneho di awa di riolering. Banda di esaki, un sistema di pipa di preshon haltu lo sòru pa transporte di awa di riolering for di e punto kaminda ta kolektá e awa sushi aki, te na Klein Hofje. E sistema aki lo kumpli ku e nesesidatnan di futuro. Ku otro palabra, e preshon riba e sistema aktual lo baha i ku esaki lo minimalisá e desagwe. Tambe gobièrnu lo krea un posibilidat pa awa fresku di laman drenta e “binnenwater” di Rif i dor di konektá e dos áreanan di palu di mangel na otro pa medio di un kanal di konekshon, lo hasi posibel pa awa sirkulá i asina eliminá e problema di sangura tambe.

 

Gobièrnu ta konsiente di e molèster temporal ku e trabounan relashoná ku Programa Rif por okashoná pa habitantenan i bishitantenan di e área i ta diskulpá di antemano. Gobièrnu ta mustra alabes riba e importansia pa ehekutá e proyektonan aki ku e urgensia nesesario, na benefisio di komunidat di Kòrsou i futuro generashonnan.

 

Pa informashon general, entre otro e situashon di tráfiko adaptá den e área di Rif, por tuma kontakto ku Ministerio di Tráfiko, Transporte i Planifikashon Urbano via WhatsApp 5999 511-8582 i Facebook (MinisterieVVRP).

 

Konsepto di tekso pa MinVVRP

Kick-Off de Programa Rif

djaluna 12 di ougùstùs 2019

 

 

Awe ta un dia importante i interesante pa komunidat di Kòrsou. 12 aña pasá, a traha un plan pa desaroyo di un área sumamente importante pa Kòrsou. Mi ta referí na e área di Rif.  

Rif tin un lugá spesial den nos tur su kurason, pasó e área di Rif ta un sentro bibu kaminda nos komunidat ta kombibí i turismo ta floresé. Ademas e ta krea oportunidat pa praktiká deporte. 

Último añanan Rif no tabata mesun vibrante mas manera e tabata 30 pa 50 aña pasá. E tempu ei den e área aki tabatin KAE – awe Aqualectra – ku e tempu ei tabatin un unidat grandi di produkshon di koriente i awa. Nos no por lubidá tampoko e fòrti kaminda polis tabatin su warda pa prezu di estadia kòrtiku. Kadena di Hotel internashonal Holiday Inn pa basta aña a pone ku e área di Rif tabata un sentro turístiko, kaminda nos mes hendenan tambe por a bai disfrutá di shownan grandi ku entre otro artistanan internashonal.

Tur lokual mi a menshoná, ya no t’ei mas. Sinembargo, pueblo mes su deseo tabata pa rebibá e área aki, i trese e Rif vibrante aki bèk i Gobièrnu di Kòrsou ta hasi tur posibel pa duna oido na e deseo aki. Pa rebibá e área, gruponan di interes huntu ku gobièrnu a yega na un plan pa desaroyá henter e área di Rif integralmente. E plan aki ta forma parti di Strategia di Kresementu pa Kòrsou.  

E aña aki a kuminsá ku e preparativonan i ehekushon di e plan original di 12 aña pasá, ku awe nos ta yama Programa Rif. Vários di e proyektonan ya ta den full swing, miéntras otronan ta den e fase preparativo. 

Pa nos di Ministerio di VVRP ta hopi importante pa ora sali afó ku informashon di nos programanan i proyektonan, pa e informashon ta di kalidat. Pa algun luna nos a traha relativamente den silensio, pero awor ku e trabounan di ehekushon poko poko a kuminsá ta bira bisto, nos ta bai sali i duna informashon amplio tokante e programa aki. 

Den e presentashon ku boso lo mira, i e rekorido den e área di Rif ku nos lo hasi despues di e presentashon, bosnan mes por tuma nota di e embergadura di e trabounan i e importansia di Programa Rif. E programa Rif ta un programa ku ta planiá pa dura 2 aña.

Manera tur proyekto i programa grandi – i esaki sigur ta unu – ta henter un tim tin ku ta duna su aporte. Promé ku pasa pa e lider di e programa aki, mi ke pasa palabra pa e direktor di e Sektor di Planifikashon Urbano di Ministerio di VVRP, señora Caroline Manuel.

 

Danki.