Demanda grandi ta pone hopi preshon riba trùknan di awa i momentu ku un trùk daña e ta keda largu tempu for di sirkulashon
Demanda grandi ta pone hopi preshon riba trùknan di awa i momentu ku un trùk daña e ta keda largu tempu for di sirkulashon
Willemstad – Na aña 2013 e minister di e tempu ei a tuma e inisiativa pa repartí awa pa esnan ku pa hòbi ta planta fruta i bèrdura pa propio uzo. E awa aki ta prosedente di pos ku tin riba tereno di AVB (ántes LVV) na Klein Kwartier. Konforme e inisiativa aki personanan ku ta planta pa hòbi por risibí 2 meter kúbiko di awa pa luna pa ehersé nan hòbi. Ku tempu e demanda a krese asina tantu ku AVB a kuminsá bende awa ku agrikultornan chikí, pero tambe kompanianan agrario grandi.
E agrikultornan grandi aki defakto no tabata e punto di salida di e maneho, pasobra pa un plantashon di mas ku 1 hèktar mester di 10 pa 20 meter kúbiko di awa pa dia. Na inisio di e proyekto di repartishon di awa AVB tabata disponé di un trùk di awa di 6 meter kúbiko ku tabata destiná pa muha vegetashon riba plenchinan públiko. Tumando na kuenta e oumento drástiko den petishonnan pa awa e minister di e tempu ei a atkerí dos trùk di awa mas, unu di 4 meter kúbiko i unu di 10 meter kúbiko. E trùknan di awa aki ta kore 5 pa 6 biaha pa dia i hasta riba djasabra pa kumpli ku e kresiente demanda.
Mirando e preshon riba e trùknan di awa aki pa kumpli ku e demanda grandi, tin komo konsekuensia ku e chèns ku e trùknan aki ta daña tambe ta oumentá. Komo ku e trùknan aki no ta vehíkulonan ku normalmente ta kore riba kaya na Kòrsou, no tin piesa pa nan na stòk i mester bestèl esakinan. Esaki ta pone ku kada bes ku un trùk di awa daña, e ta keda un tempu largu for di sirkulashon i esaki lamentablemente tin komo konsekuensia ku agrikultornan mester warda un tempu mas largu pa haña awa