Minister Xiomara Ruiz-Maduro a splica riba palabracion haci cu grupo di aduana: Gobierno lo reuni cu nan dia 2 di september proximo pa asina por ‘rond af’ e asunto di e areglo salarial nobo di Aduana

Minister Xiomara Ruiz-Maduro a splica riba palabracion haci cu grupo di aduana:
Gobierno lo reuni cu nan dia 2 di september proximo pa asina por ‘rond af’ e asunto di e areglo salarial nobo di Aduana

ORANJESTAD – Diabierna mainta Minister di Finansa, Asuntonan Economico y Cultura hunto cu colega Minister di Husticia a atende e grupo di Aduana hunto cu nan sindicato SADA kendenan a marcha bin Bestuurskantoor buscando atencion pa nan ‘salarishuis’ cu ainda no a keda concretisa.
Tabata na juni 2017 cu e Gobierno anterior a yega na un convenio cu e sindicato di Aduana pa a asina haci adaptacion na e salario di Cuerpo di Aduana. Como cu tabata na vispera di eleccion, mucho no a wordo haci pa por a cuminsa cu e implementacion di e cambionan necesario. Na momento cu e gobierno nobo a asumi e responsabilidad a atende e trabounan necesario cu diligencia y a pone fondo disponibel den presupuesto 2018 y 2019 pa por cubri e cambionan acorda den e convenio ya cu gobernacion mester por conta cu continuacion.
Sinembargo durante e ehecucion di locual a keda acorda, a surgi preguntanan riba e precedente cu algun di e cambionan acorda por trece cune pa e aparato gubernamental y pesey Conseho di Minister a pidi Departamento di Recurso Humano (DRH) pa brinda un conseho riba e precedente di e cambionan y nan posibel consecuencia financiero. E ultimo aki ta necesario en bista di e situacion financiero y e acuerdo pa baha gasto di personal manera stipula den e Memorandum Financiero y Economico di nos Pais y a base di esaki e Protocol sera cu Hulanda na november 2018. E conseho di DRH a keda cla fin di juni y despues di ser trata den Conseho di Minister, a dicidi di pidi extra conseho na Departamento di Legislacion (DWJZ) pa por tuma decision na un manera responsabel. E conseho di DWJZ a keda presenta diahuebs ultimo na Conseho di Minister.
Minister Ruiz-Maduro a trece dilanti cu nan a splica e situacion cu a surgi na e manifestantenan y a invita SADA pa reuni cu nan na e mesun momento pa asina splica nan mas detayadamente riba e conseho ricibi e dia anterior. Por ultimo a keda palabra cu SADA cu Gobierno lo reuni cu nan dia 2 di september proximo pa asina por ‘rond af’ e asunto di e areglo salarial nobo di Aduana.

 

 

 

 

 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: