DEPARTAMENTU DI ARBITRAHE KU SU ÚLTIMO KURSO DI ARBITRAHE PA E AÑA AKI! INISIO DI E KURSO LO TA 10 DI NOVÈMBER 2023!
DEPARTAMENTU DI ARBITRAHE KU SU ÚLTIMO
KURSO DI ARBITRAHE PA E AÑA AKI!
INISIO DI E KURSO LO TA 10 DI NOVÈMBER 2023!
Departamentu di arbitrahe di FFK lo organisá e último kurso di arbitrahe pa e aña aki. Tur hende muhé i hòmber di 15 aña òf mas por partisipá na e kurso ku ta inisiá 10 novèmber binidero, pa dirigí entre otro weganan di Kampionato Hubenil ku ta e kategorianan di U-9 te ku U-20, Kampionato Femenino i tambe partidonan di FFK su kampionatonan.
Manera tabata e kaso durante e kursonan anterior, Departamentu di arbitrahe ta enkurashá spesialmente nos hende muhénan pa partisipá na e kurso aki debí ku no tin asina tantu hende muhé ku ta arbitro. FIFA ta stipulá ku partidonan femenino mester keda dirihí pa rèfrinan femenino. Pues un yamada ta bai na tur dama pa bin duna un man i amplia nos kuerpo di arbitrahe.
E kurso lo inisiá djabièrnè otro siman, 10 di novèmber 2023 di 6’or di atardi pa 8’or di anochi i lo finalisá djasabra 26 di novèmber próksimo ku un èksamen di 10’or di mainta pa 12’or di mèrdia.
E fecha ku orarionan ta lo siguiente:
| Dia | Fecha | Orario | Lugá |
| Djabièrnè | 10 novèmber 2023 | 6-8 PM |
Sala di FFK |
| Djasabra | 11 novèmber 2023 | 9 AM – 5 PM | |
| Djamars | 14 novèmber 2023 | 6-8 PM | |
| Djaweps | 16 novèmber 2023 | 6-8 PM | |
| Djabièrnè | 17 novèmber 2023 | 7-9 PM | |
| Djasabra | 18 novèmber 2023 | 9 AM – 5 PM | |
| Djamars | 22 novèmber 2023 | 6-8 PM | |
| Djaweps | 24 novèmber 2023 | 6-8 PM | |
| Djasabra | 26 novèmber 2023 | 10 AM – 12 PM |
Ora kompletá e kurso ku éksito lo tin un periodo di ‘stage’ di 6 luna promé ku risibí e diploma.
Pa inskripshon por tuma kontakto ku departamentu di arbitrahe na referee@ffk.cw, via di number di telefòn 7365040 (ekstenshon 102) òf por manda un ‘app’ na 5482310.
Inskripshon ta kosta fl.10,- i e kurso mes ta grátis, ku tur material inkluí.
Por inskribí te ku 10 di novèmber 2023. Pa abo ku ta un hóben dinámiko ku outoridat i ku ambishon, esaki ta bo oportunidat pa bira rèfri.
Probecha di e ùltimo chèns di 2023 pa inskribí i forma parti di e famia di rèfrinan ku ta dirihí nos kampionatonan lokal.
Inskribí awe mes, Departamentu di arbitrahe i FFK ta warda bo!
3 novèmber 2023
