Ta 1 malchi finansiero tin segun nos lei máksimo pa loke ta trata Kuenta Koriente di Pais Kòrsou.
Ta 1 malchi finansiero tin segun nos lei máksimo pa loke ta trata Kuenta Koriente di Pais Kòrsou.
Parlamentario Curtley Obispo den e reunion di Parlamento di Kòrsou di dia 12 ougùstùs 2019 a mustra riba e malchi finansiero pa loke ta trata e Kuenta Koriente di Pais Kòrsou. A base di nos lei máksimo, e Areglo di Estado di Kòrsou su artíkulonan 84 i 85 insiso 2 i 4, nos Pais Kòrsou konosé for di 10 oktober 2010, un malchi finansiero pa loke ta ehekushon di e Presupuesto Kuenta Koriente (“Gewone Dienst”) di Pais Kòrsou. Ta ku e kontribushon kolektivo di belasting na tempu di kontribuyentenan di Pais Kòrsou ta finansiá e gastunan kolektivo di Pais Kòrsou. Ku otro palabra no por fia segun nos lei máksimo pa e gastunan kolektivo di Kuenta Koriente di Pais Kòrsou. Ta ku forsa di kontribushon kolektivo na tempu di belasting di tur kontribuyentenan ta paga i garantisá na tempu e gastunan kolektivo di Pais Kòrsou. Si ke mantené e gastunan kolektivo di Pais Kòrsou esei ta nifiká ku ta kontribuyentenan di belasting mester duna nan kontribushon di belasting na tempu segun nos leinan fiskal, pa asina evitá un défisit presupuestario den ehekushon di e Presupuesto Kuenta Koriente di nos Pais Kòrsou.
Segun Parlamentario Curtley Obispo pa evitá un défisit finansiero den ehekushon di Presupuesto Kuenta Koriente di Pais Kòrsou ta super importante e kontribushon kolektivo di nos tur. P’esei tur kontribuyente di belasting mester kontribuí na tempu komo kompatriotanan ku nan kontribushon di belasting na kaha di Pais Kòrsou. Pa asina por garantisá pago na tempu di gastunan kolektivo na bienestar di nos kompatriotanan i tambe henter nos Pais Kòrsou. Ta trata di garantisá i paga na tempu e gastunan kolektivo di Pais Kòrsou pa loke ta trata entre otro: (a) ònderstant, (b) penshun, vut, duurtetoeslag di empleadonan públiko ku a bai ku penshun, (c) gastunan di personal di tur empleadonan públiko den servisio, (d) material i servisio pa Organonan di Estado i tur e 9 ministerionan di henter e aparato gubernamental, (e) kontribushon di Pais Kòrsou na Banko di Seguro Sosial (SVB) pa asina por garantisá pagonan na tempu na tur benefisiarionan di e leinan di labizjan, seguro médiko, penshun behes i (f) supsidionan pa enseñansa, fundashonnan, institutonan i organisashonnan,
Parlamentario Curtley Obispo a sigui mustra i enfatisá na kada un di nos riba e importansia di 100% solidaridat di pago belasting segun nos leinan fiskal ku e meta pa huntu nos logra komo Pais Kòrsou. Ta p’esei mester tin sivismo fiskal, solidaridat di belasting i tambe orden fiskal den ehekushon di leinan fiskal di Pais Kòrsou pa asina garantisá kontribushon di belasting na tempu di tur kontribuyentenan di belasting.
