Mester atendé i koregí e défisit operashonal riba strepi di e Presupuesto di Kuenta Koriente 2019 di Pais Kòrsou.
Mester atendé i koregí e défisit operashonal riba strepi di e Presupuesto di Kuenta Koriente 2019 di Pais Kòrsou.
Parlamentario Curtley Obispo den e reunion publiko di Parlamento di Kòrsou di dia 12 ougùstùs 2019 a mustra riba e hecho ku den 8 aña i 22 dia di Pais Kòrsou, no a atendé strukturalmente i resolvé e défisit (“tekort”) operashonal riba e strepi di e Presupuesto nan di Kuenta Koriente di Pais Kòrsou. Tambe e la mustra riba e siguiente hechonan: (1) ku e défisit operashonal riba e strepi di e Presupuesto nan di Kuenta Koriente di Pais Kòrsou di añanan 2010 te ku 2018, a wòrdu kousa dor ku gastunan kolektivo di kada aña ta mas ku entradanan kolektivo di kada aña di kontribushon di belasting di kontribuyentenan, (2) ku e défisit operashonal riba e strepi a wòrdu di lapi ku entradanan no struktural di dividendonan, BRK (Belasting Regeling Koninkrijk) i tambe reservanan; (3) ku e kontribushon kolektivo di kontribuyentenan di belasting, strukturalmente durante e promé 8 aña i 22 dia di Pais Kòrsou no tabata sufisiente pa paga i kubri e gastunan kolektivo di Pais Kòrsou.
A base sifranan di e kuentanan anual (“jaarrkening) di añanan 2010 te ku 2015 kontrolá di akountentnan di Kontrolaria General/ SOAB i e Rapòrtnan di Maneho Finansiero di añanan 2016 te ku 2018, e défisit operashonal riba strepi entre 10 òktober 2010 te ku 31 desèmber 2018, ta igual na un total di 698.2 mion florin. E défisit operashonal riba e strepi aki, kual a wòrdu di lapi ku dividendonan, BRK i reservanan pa un total di 425.1 mion florin.
Tambe parlamentario Curtley Obispo a mustra ku e instrukshon di aña 2012 no a yuda pa strukturalmente atendé ku e défisit operashonal riba strepi di e Kuenta Koriente di Pais Kòrsou di añanan 2012 te ku 2016. Ku e instrukshon di 2012, ta lapi a sigui lapi ku BRK, dividendo i tambe reservanan. I awe por konstatá den añanan 2017 i 2018 ku e lapi ta kabando. A base di: (a) e sifranan di e promé 8 añanan i 21 dia di Pais Kòrsou i (b) nos lei máksimo su artíkulonan 84 i 85 insiso 2 i 4 di Areglo di Estado di Kòrsou, por konkluí ku a yega e momento pa atendé strukturalmente i koregí e défisit operashonal riba strepi di e Presupuesto 2019 di Kuenta Koriente di Pais Kòrsou. Ku sivismo fiskal, órden fiskal i solidaridat di belasting, mester atendé i koregí e défisit 2019 di kontribushon di belasting dor di kontribuyentenan. Tur esaki na bienestar i progreso di nos Pais Kòrsou.