Parlamentario Curtley Obispo: Na bienestar di empleo i tambe kontinuidat di e servisio di Selikor N.V., mester koregí e tarifanan di afvalstoffenbelasting.

Na bienestar di empleo i tambe kontinuidat di e servisio di Selikor N.V., mester koregí e tarifanan di afvalstoffenbelasting.

Parlamentario Curtley Obispo, durante e reunionnan di Parlamento di Kòrsou di dianan 26 i 27 ougùstùs 2019, a mustra riba e kambionan prinsipal pa loke ta trata e Lei di Afvalstoffenbelasting (AB 1995 no. 48).  A base di e Lei bálido di Afvalstoffenbelasting i e di e Lei/Memoria di Aklarashon 2019, mester hasi kambionan den tarifanan eksistente kual ta urgente i nesesario. Kambionan ku ta urgente i nesesario, segun e malchi finansiero di e lei aki. Na bienestar di empleo i kontinuidat di e servisio di Selikor N.V., mester koregí e tarifanan di afvalstoffenbelasting a base di artíkulo 4 inisio 1 di e Lei di Afvalstoffenbelasting. Artíkulo 4 insiso 1, kual a drenta na vigor 1 yanüari 1996, ta indiká bon kla i raspa ku bou di e nòmber di afvalstoffenbelasting ta kobra un belasting ku e meta pa kubri gastunan: (1) di rekohementu di sushi di kas, ku no ta riba petishon i (2) di rekohementu di sushi di negoshi den sentro di suidat. 

Parlamentario Curtley Obispo, a mustra tambe den kuadro di artíkulo 4 insiso 1 i tambe kalkulashonnan hasi, ku mester koregí e tarifa di 20 florin pa 35 florin pa luna pa loke ta trata rekohementu di sushi di kas, ku no ta riba petishon. Tin ku koregí pasombra: (1) durante e periodo di añanan 1996 te ku aña 2019, tabata tin un kresementu enorme di kasnan aki na Kòrsou i e tarifa no ta kubri e kresementu aki. Ta di menshoná ku Ofisina Sentral di Statistik (CBS) den su publikashon di dia 28 mart 2019 a indiká ku e kantidat di kasnan na Kòrsou a krese di 49,045 pa 75,087 kas (53.1% ) entre añanan 2001 te ku 2017. Tin ku koregí pasombra: (2) gastunan i invershonnan hasi durante añanan pa loke ta trata rekohementu di  sushi di kas a subi i te hasta a wòrdu pre finansiá dor di Selikor N.V. Tin ku koregí pasombra: (3) tin un défisit (“tekort”) struktural di tarifa pa añanan, kual ta kousa dor di e kresementu den kasnan aki na Kòrsou sin ku a adaptá e tarifa ariba menshoná na tempu. Ta p’esei den kuadro di artíkulo 84, 85 insiso 2 i 4 di nos Areglo di Estado di Kòrsou (nos lei máksimo) i tambe artíkulo 4 insiso 1 di e Lei di Afvalstoffenbelasting di 1995, tin ku aktua i tambe koregí e défisit struktural kousa dor di e tarifa aktual di kontribushon. Tambe mester adaptá e 5 otro tarifanan di afvalstoffenbelasting pa loke ta trata rekohementu di sushi di negoshi den sentro di suidat. Pues tin sentido di urgensia bálido, pa koregí e défisit struktural pa loke trata e afvalstoffenbelasting ku e meta: (a) bienestar di empleo i kontinuidat di e servisio di Selikor N.V., (b) bienestar di e kaha di Pais Kòrsou. Pa asina Pais Kòrsou por paga e Selikor N.V. e gastunan kolektivo presupuestá pa loke ta trata rekohementu di sushi di tur kasnan i tambe di sentro di suidat i (c) eliminá strukturalmente e défisit di tarifa di afvalstoffenbelasting , den presente i futuro durante ehekushon di Presupuestonan di Kuenta Koriente di Pais Kòrsou.  

Ku e kambionan di tarifanan den e Lei di Afvalstoffenbelasting, aprobá dor di Parlamento di Kòrsou i publiká dor di Gobièrnu di Kòrsou, ta introdusí entre otro entrante 1 sèptèmber 2019: (1) e tarifa nobo di 35 florin pa luna, kual mester wòrdu paga segun artíkulo 7 insiso 4, den 30 dia dor di tur kontribuyentenan ku tin un Kliko i ku no tin eksonerashon, (2) e 5 tarifanan adaptá pa loke ta trata rekohementu di sushi di negoshi den sentro di suidat. Tarifanan adaptá kual segun artíkulo 7 insiso 5 di e lei mester wòrdu paga den 15 dia dor di tur kontribuyentenan di sentro di suidat. Tambe mester indiká ku ta mantené e eksonerashon (artíkulo 4 insiso 2)di e lei pa personanan ku tin un Kliko i ku por proba ku nan “zuiver inkomen” segun nan último aangifte inkomstenbelasting ta bou di 30,463 florin pa aña.. Aki por pensa riba entre otro: kobradónan di ònderstant, penshonado ku tin únikamente penshun di behes (AOV), òf trahadónan ku tin salario mínimo. Por hasi un petishon pa eksonerashon na Selikor N.V