Ta finalisando e di dos fase: Remodelashon na Renaissance Curaçao Resort & Casino ta segun skema 

Ta finalisando e di dos fase:

Remodelashon na Renaissance Curaçao Resort & Casino ta segun skema 

 

WILLEMSTAD – Durante di e último 4 lunanan Renaissance Curaçao Resort & Casino a bin ta traha deligentemente riba e realse di e hotèl, tur esaki pa huéspetnan por sigui disfrutá di e kalidat ku Renaissance Curaçao Resort & Casino a bin ta ofresé bishitantenan lokal i internashonal durante di e último 10 añanan. Di akuerdo ku sra. Maylin Trinidad, General Manager, nan ta hopi satisfecho ku e resultadonan te ku awor, i huéspetnan mes tambe ta hopi entusiasmá. 

 

“Nos ta práktikamente klá ku e di dos fase di rekonstrukshon. Esaki a enserá primordialmente e remodelashon di nos kambernan. Nan ta risibiendo un ‘upgrade’ total, i próksimamente lo figurá un fusion di elementonan urbániko i di naturalesa manera arte di serámika lokal i kolónan vibrante, pero subtil. Lo usa kolónan moderno pa krea un refugio privá pa tur huéspet. Tambe tin kambionan tumando lugá prinsipalmente na e lobby, entrada di casino, i Nautilus Restaurant. Tur trabou ta riba skema pa wòrdu finalisá den luna di desèmber; nos lo tin un produkto kompletamente renobá pa ofresé nos huéspetnan”, asina sra. Trinidad a finalisá bisando. 

Nautilus ta pasando den un remodelashon ekstenso; e restorant ku a bin ta ofresé e brunch di mas popular na Kòrsou lo reflehá un konsepto sofistiká. Durante di e remodelashon ta ofresé ‘American Breakfast Buffet’ den Atrium miéntras lunch i dinner ta optenibel a-la-carte na Infinity Beach Club, na e di dos piso di e resort.