CBCS ta reanudá trabounan for di ofisina

CBCS ta reanudá trabounan for di ofisina

Willemstad/Philipsburg – A base di e anunsio di gobièrnu ku e medidanan pa ku COVID-19 a keda
suavisá, e ofisina di Centrale Bank van Curaçao en Sint Maarten (CBCS) na Kòrsou lo habrí djaluna
11 di mei pa su empleadonan. E ofisina na Sint Maarten ta keda será miéntras e medida di ‘‘shelter in
place’ ta na vigor. Empleadonan na Sint Maarten lo ehersé nan trabou for di kas.
E ofisina na Sint Maarten ta keda será miéntras e medidanan einan ta keda na vigor. E tareanan lo
kontinuá, meskos ku tabata e kaso na Kòrsou, for di kas.
CBCS tambe lo konosé un ‘normal nobo’ kaminda gerensia i empleadonan lo mester tene nan mes na
reglanan general di higiena i mantené distansia sosial i físiko. Pa esaki a implementá vários medida
interno. Reunionnan por lo pronto lo tuma lugá den forma di telekonferensianan i den e edifisio a hasi
adaptashonnan logístiko pa kumpli ku e medida di 2 meter di distansia.
Pa públiko en general CBCS lo keda será te próksimo aviso. P’esei nos ta pidi pa tene kuenta ku no
por bishitá e departamento di Kaha pa kumpra monedanan nobo/no-sirkulá (konmemorativo) ni
kambia biyetenan i monedanan daña. Tampoko lo ofresé oportunidat pa organisá aktividatnan den
Banko. Tasanan di kambio ta disponibel diariamente riba e wèpsait di CBCS.

Willemstad, 8 di mei 2020
CENTRALE BANK VAN CURACAO EN SINT MAARTEN